A do të kandidojë Malltezi për deputete? Ja skenari që e detyron të hyjë në zgjedhje

Argita Malltezi, vajza e ish-Kryeministrit Sali Berisha, në emisionin “Open” në News24 tha se gazetarët duhen paditur në gjykatë.
“Nuk ndjehem krenare kur padis në gjykatë një gazetar, por kjo më ka kushtuar mua duke mos i paditur. Kemi pasur kosto jashtë vendit pikërisht për këtë sepse qoftë unë, qoftë Shkëlzeni nuk kemi paditur gazetarë në gjykatë”, tha Malltezi.

Erli Murati e pyeti Malltezin nëse ka ose jo besim te drejtësia, te gjykata?
Ajo tha se ka besim te e vërteta, ndërsa e konsideroi drejtësinë në Shqipërinë si të kapur.

“Ligji 9516 që flet për organet e drejtësisë, thuhet se SPAK ka të drejtë të survejojë gjyqtarët. Ku ka një vend në Botë që prokuroria të survejojë gjyqtarët?”, tha Malltezi.

Ajo tha se dosja është në vazhdim të dosjeve që godasin opozitën, është vijimi i sulmeve ndaj figurave të opozitës që kanë një peshë të caktuar, ndërsa përmendi këtu Fatmir Mediun, Ilir Metën, Fredi Belerin dhe së fundmi Sali Berishën.

Në këtë kuadër, Malltezi e konsideroi si një sulm politik atë që po ndodh me ish-Kryeministrin, i cili prej 10 muajsh ndodhet në “arrest shtëpie”.

“Jemi përpara kushteve shumë të vështira, asgjë nuk varet nga ‘jeta vdekje’ si të thuash që Berisha është nën arrest. Po ju sjell shembullin e Trump, ku dikush tha se nëse ai nuk do të vihej në akuzë, ai nuk do të kishte këtë sukses si kandidat.

Ndoshta akuzat që i bëhen politikisht Berishës, duhet të angazhojnë edhe më shumë strukturat. Opozita kërkon Qeveri teknike, strukturat duhet të organizohen dhe të ngrihen ta bëjnë realitet këtë”, tha Malltezi.

Ajo tha se Berisha do të drejtojë fushatën për zgjedhjet dhe pas kësaj do të bëhet një garë për të caktuar Kryeministrin.

“Parimi që u vendos ishte që kryetarin e PD të mos e caktonte dikush tjetër”, tha ajo.

E pyetur nëse do të kandidojë për kryetar të PD-së, Malltezi tha se nuk ka asnjë plan B, duke pohuar se Partia Demokratike do të shkojë me Sali Berishën kryetar në zgjedhje.

“Se çfarë do të ndodhë më tej unë nuk e di, por tani nuk ka asnjë plan B”, tha Malltezi.

Ajo theksoi se nuk do të kandidonte në të njëjtën listë ku ndodhet emri i babait të saj, Sali Berishës, kryetar i PD-së.

“Unë do të kandidoj për deputete vetëm nëse ka një skenar për të ndaluar Sali Berishën që të kandidojë për deputet. Vetëm në këto kushte unë do të mendoj kandidimin, pasi nuk e kam si çështjes primare.

Fakti që Sali Berisha mbahet në një masë kaq të gjatë arresti tregon se ka një skenar për të mos e lejuar që të kandidojë.