Pas largimit nga posti i tij, ish-kancelari i Austrisë Sebastian Kurz ka dhënë intervistën e tij të parë, ku nga publiku i janë bërë pyetje të ndryshme. Një nga pyetjet ishte nëse ka plane që mund të rikthehet sërish në politikë apo ajo. Dhe Kurz tha se nuk po planifikon një rikthim në politikë. “Unë e përjashtoj përgjithmonë një kthim në politikë”, tha ai për gazetën Kronen Zeitung,
Paraqitja e tij në një konferencë të partisë, më 14 maj, do të shërbejë vetëm për të mbështetur pasardhësin e tij, Karl Nehammer, tha Kurtz. Politika e brendshme nuk luan më asnjë rol në jetën e tij, tha 35-vjeçari, duke shtuar megjithatë: “Unë ende ndjek zhvillimet gjeopolitike”.
Kurz dha dorëheqjen nga posti i kancelarit në vitin 2021 dhe më pas nga politika në përgjithësi. Ai tani punon për miliarderin amerikan Peter Thiel në pozitën e strategut global. Ndërkohë, gjyqësori po e heton atë, ndër të tjera, me dyshimin se ka dhënë deklarata të rreme në një komision parlamentar që hetonte të ashtuquajturën “çështja Ibiza”, një skandal që përfshinte zyrtarë te lartë austriak në veprime të kundërligjshme si dhe korruptive. Kurz tha se i pëlqen të jetë në udhëtime, kryesisht në Lindje të Mesme dhe SHBA. /REL
Discussion about this post