Ish-deputeti i Partisë Demokratike, Ervin Salianji, i ftuar në emisionin “Kjo Javë”, ka komentuar situatën e krijuar brenda PD-së, ndërsa ka nisur një lëvizje me demokratët në mbarë vendin, në një kohë kur lidershipi aktual e ka cilësuar atë si “të vetëpërjashtuar”.
I pyetur nëse do të garojë kundër Sali Berishës në zgjedhjet e brendshme të partisë, Salianji u shpreh se aktualisht nuk ndodhet në një fazë gare personale, por në një proces dëgjimi dhe grumbullimi të shqetësimeve të demokratëve.
“Unë po mbledh shqetësimet e demokratëve. Do të kemi një etapë tjetër kur do të flasim për rrugët e zgjidhjes. Kjo nuk është një fazë ku ka garë apo shprehje ambiciesh personale”, tha Salianji.
Sipas tij, fokusi i lëvizjes që ka nisur nuk është një përballje për poste, por rikthimi i Partisë Demokratike si një forcë fituese.
“Në këtë fazë them vetëm një gjë: dua që PD të jetë fituese. Lëvizja dhe mendimi im është që PD të fitojë dhe të bëjmë gjithçka për këtë. Nuk përjashtoj asgjë nga ajo që do të thonë demokratët”, u shpreh ish-deputeti.
Salianji theksoi se vendimet për të ardhmen e partisë duhet të burojnë nga baza dhe nga idetë më të mira për ringritjen e saj.
“Duhet të gjejmë çdo rrugë, rrugën më të mirë, idetë më të mira dhe ta bëjmë partinë fituese”, përfundoi ai.
Në një kohë kur ai ka nisur një lëvizje me demokratët në të gjithë Shqipërinë, ndërsa lidershipi aktual e ka akuzuar dhe ka deklaruar se është vetëpërjashtuar nga partia.
Duke iu referuar protestave, Salianji hodhi dyshime mbi arsyet pse sheshet e opozitës janë zbrazur, duke theksuar se Shqipëria nuk është një regjim i mbyllur dhe se qytetarët janë të informuar dhe të aftë të reagojnë kur ndjejnë se përfaqësohen.
Deklaratat e Salianjit tregojnë thellimin e përçarjeve brenda PD-së, ndërsa lëvizja e tij po përpiqet të artikulojë një linjë alternative për të ardhmen e opozitës.
Salianji theksoi se elementi më i rëndësishëm i opozitës është epërsia morale ndaj qeverisë, duke e cilësuar mazhorancën si të cenueshme për shkak të korrupsionit dhe përgjegjësisë për vendimet që merr. Sipas tij, opozita në çdo vend duhet të jetë më e pastër dhe të reagojë në mbrojtje të interesit publik.
Ai deklaroi se lëvizja që ka nisur nuk është personale, por pasqyron shqetësimet e shumë demokratëve që kërkojnë ndryshim dhe demokratizim të partive politike. “Nuk mund të thuash për një problem të ngritur në parti ‘ky është vetëpërjashtuar’. Kjo është shmangie e problemit, jo zgjidhje,” u shpreh Salianji.
Salianji kritikoi gjithashtu qëndrimet kontradiktore të lidershipit të PD-së për mënyrën se si mund të rrëzohet qeveria Rama, duke theksuar se herë flitet për mbështetje nga SHBA-të, herë për zgjedhje, e herë për pamundësinë e tyre. “Të paktën të ecim në një drejtim të qartë,” tha ai.
Discussion about this post