A do të vijojnë reshjet? Parashikimi i motit për javën në vijim

Duke lënë pas këtë fundjavë me reshje shiu të dendura; për javën që presim përpara, vendi ynë do të vijojë të jetë nën ndikimin e kushteve atmosferike të paqëndrueshme.

Moti për të gjitha ditët parashikohet me vranësira mesatare dhe të dendura, por nuk do të mungojnë lokalisht edhe alternimet me kthjellime. Për ditën e Hënë dhe të Martë vranësirat do të shoqërohen me reshje shiu të herëpashershme me intensitet të ulët.

Ditën e Mërkurë reshjet do të jenë me intensitet mesatar dhe në orët e vona të mbrëmjes reshjet hera-herës fitojnë intensitet deri të lartë në formën e rrebesheve dhe stuhive shoqëruar me shkarkesa elektrike.

Ditën e Enjte përsëri reshjet me intensitet të ulët dhe lokalisht në formë shtrëngatash, parashikon Shërbimi Meteorologjik Ushtarak.

Për ditën e Premte rikthehen përsëri reshjet me intensitet të lartë.

Zona e veriut dhe ajo e qendrës parashikohen me mot me vranësira të dendura dhe reshje shiu të cilat pas orëve të mesditës do të jenë me intensitet të lartë në formën e rrebesheve dhe stuhive shoqëruar me shkarkesa elektrike.

Zona e jugut parashikohet me mot me alternime kthjellimesh e vranësirash deri të dendura shoqëruar me reshje shiu të dobta dhe lokale.