Mundësia e humbjes së mandatit të deputetit nga Sali Berishës për shkak të mungesës në Kuvend, ka qenë një ndër temat e diskutuar përgjatë javëve të fundit.
Megjithatë, teza është hedhur poshtë nga kryeparlamentarja Lindita Nikolla. Gjatë mbledhjes së konferencës së kryetarëve, Nikolla është shprehur se Berishës nuk i mbaron mandati i deputetit pavarësisht mosprezencës në Kuvend. Kryeparlamentarja deklaroi se Sali Berisha ka munguar për më shumë se 6 muaj në Kuvend, por ka pasur arsye.
Prej 30 dhjetorit të vitit të kaluar, Sali Berisha vijon të qëndrojë nën masën “arrest shtëpie”, pasi akuzohet për korrupsion, në procesin hetimor për privatizimin e kompleksit sportiv “Partizani”.
Të njëjtën argument si Nikolla ka dhënë më herët edhe avokati që përfaqëson Berishën në seancat gjyqësore, Genc Gjokutaj.
“Zoti Berishës mandatin ja ka dhënë populli. Zoti Berisha nuk mungon në Kuvend për shkak të mungesës së dëshirës së tij siç e kërkon Kushtetuta që thotë ‘mungon pa arsye’. Ne e kemi bërë kërkesën në gjykatë, SPAK, Apel, Gjykatën e Lartë dhe ata kanë vendosur në kundërshtim me Kushtetutën, me praktikën e tyre. Kemi raste të arrestuarish që kanë vajtur në Kuvend dhe kanë votuar. Pra mungesa e zotit Berisha nuk është për faj të tij. Kështu që mandati i tij mbetet i pacënuar ligjërisht”, tha avokati në një prononcim për mediat një javë më parë, në përfundim të një seancë gjyqësore në Apelin e Gjykatës së Posaçme.
Discussion about this post