Kreu i grupit parlamentar të PS-së, Bledi Çuçi deklaroi se për çështjen e mandatit të Olta Xhaçkës do të vendosë Këshilli i Mandateve dhe Rregullores.
Lidhur me moszbatimin e vendimit të Kushtetueses, ai tha se “Kuvendi ka qenë në flakë dhe tym”.
“Në bazë të vendimit të gjykatës Kushtetuese është mbledhur këshilli i Legjislacionit. Aty do të informohemi për vendimin. Ndaj ia kemi dërguar Këshillit të Mandatit të Rregullores. Por Kuvendi ka qenë në flakë dhe tym. Vendimmarrja është e grupit parlamentar. Do të mblidhet Këshilli i Mandatit dhe Rregullores. Këshilli i Legjislacionit që merr vendimin e Kushtetueses, e shqyrton dhe më pas thotë; do i kalojë Këshillit të Mandateve. Pra do të mblidhet Këshilli i Mandateve. Vendimet i marrim të gjithë bashkë. Ajo është një çështje që duhet ta marrë Këshilli i Mandateve. Ju këshilloj që ta lexoni mirë atë vendim. S’kemi një vendimmarrje, se nuk jam unë Këshilli i Mandateve. Nuk e mbledh unë Këshillin”, tha Çuçi në një prononcim për mediat, në përgjigje të interesit të gazetarëve.
Kërkesa për heqjen e mandatit të deputetes për Olta Xhaçkën në Kushtetuese erdhi pas përfitimit të statusit të investitorit strategjik, të bashkëshortit të saj.
Ky fakt sipas opozitës, përbënte konflikt interesi e për këtë arsye kërkoi ndërprerjen e mandatit të deputetit, për Xhaçkën. Shumica socialiste nuk e pranoi kërkesën. Çështja përfundoi në Gjykatën Kushtetuese, e cila e konsideroi të gabuar vendimin e parlamentit duke urdhëruar që rasti të paraqitej për shqyrtim pranë saj. Por ndonëse ka kaluar më shumë se 1 vit, çështja është zvarritur nga Kuvendi dhe ende nuk i ka shkuar Gjykatës.
Discussion about this post