Rasti i të riut Lear Kurti që vdiq në Komisariat, ka ngritur dyshime mbi mënyrën e funksionimit të Policisë së Shtetit. Ngjarja e rëndë solli në vëmendje atë që kërkohet në këto raste, dorëheqjen e drejtuesve të institucioneve. I gjendur përballë një rasti edhe më të rëndë, siç ishte vrasja e Klodian Rashës nga një polic, ish-ministri i Brendshëm Sanër Lleshaj, ka folur në emisionin “Log.” për ngjarjen tragjike.
I pyetur nëse pasardhësi i tij Bledi Çuçi duhet gjithashtu të japë dorëheqjen, ai refuzoi të komentonte, ndërsa aktin e tij e cilësoi zbatim të bindjeve të tij.
“Është aq e drejtpërdrejtë sa s’mund të marrë një përgjigje të drejtpërdrejtë kjo pyetje. Rezervohem të jap komente. Unë jam vënë përballë një situate të vështirë në dhjetorin e 2020 dhe kam marrë një akt që është i njohur. Nuk e kam marrë në funksion të dhënies së ndonjë mesazhi, por ka qenë akt i imi privat. Përgjigje ndaj bindjes time të thellë që qytetarët tek policët duhet ta shohin fytyrën e ministrit. Dhe nëse kemi devijime dhe shkelje të rënda, diçka do ta shohin nga fytyra e ministrit. Të gjitha rastet ngjajnë dhe nuk ngjajnë, në thelb asokohe kishim një akt të rëndë, vrasje që është konfirmuar edhe nga gjykata”, tha Lleshaj.
Discussion about this post