Të tjera detaje raportohen mbi gjendjen shëndetësore të ish-Kryeministrit Fatos Nano, i cili prej disa ditësh ndodhet në një prej spitaleve private në Tiranë.
Sipas News24, gjendja shëndetësore e ish-Kryeministrit ka një përmirësim të lehtë, ndërkohë që mjekët kanë realizuar një ndërhyrje kirurgjikale për ti lehtësuar frymëmarrjen.
Sipas burimeve që i referohet televizioni në fjalë, rehabilitimi shëndetësor mbetet i vështirë dhe i ngadalshëm.
Mjekët i kanë bërë një ndërhyrje kirurgjikale në trake duke i vendosur një tub plastik, që po e ndihmon në furnizimin me oksigjen.
Ditët e fundit shëndeti i ish-Kryeministrit ishte rënduar dhe për pasojë ai ndodhej në reanimacion, ku ishte intubuar.
Duket se ndërhyrja, e cila thuhet se i ka lehtësuar frymëmarrjen, synon nxjerrjen nga intubimi të ish-Kryeministrit, për të shpresuar më pas në një përmirësim gradual të gjendjes shëndetësore.
Fatos Nano po përballet me SPOK, sëmundje pulmonare obstruktive kronike që ngushton dhe dëmton rrugët ajrore të mushkërive.
Ish- kryeministri ka pasur probleme me shëndetin edhe dy vjet më parë.
Discussion about this post