Zv. ministri i financave në qeverinë e Republikës së Bullgarisë, Metodi Metodiev duke folur për mediat e vëndit të tij analizoi faktin e integrimit apo jo të Bullgarisë në Eurozonë. Ai theksoi se nuk do të mbetet mirazh anëtarësimi në këtë zonë ekonomike ekskluzive.
Ai komentoi deklaratën e ministres së financave, Rositsa Velkova të premten se Bullgaria do të shtyjë datën e synuar për anëtarësimin në eurozonë. Sipas Metodiev, Bullgaria duhet të zbatojë reformat për të cilat është zotuar dhe që i janë dorëzuar Kuvendit Kombëtar si projektligj dhe duhet të ketë një tendencë më të qëndrueshme të uljes së inflacionit për të arritur kriteret e inflacionit për hyrjen në eurozonë.
“Qeveria deri tani ka bërë shumë punë teknike dhe politike, por ne nuk i plotësojmë këto dy kritere, Kuvendi Kombëtar me veprimet që ka bërë në lidhje me programin legjislativ në muajin e fundit të ekzistencës së tij, ka punuar kundër vendimit të tij të 27 tetorit për anëtarësim në eurozonë”, sqaroi Metodiev.
“Qeveria e përkohshme do të vazhdojë punën e saj në përgatitjet teknike për kalimin në euro, kjo është edhe marrëveshja me partnerët tanë evropianë nga Komisioni Evropian dhe BQE,” tha Metodiev, duke shtuar se sapo Bullgaria të ketë një horizont të qartë për një rënie të qëndrueshme të inflacionit, do të paraqesë kërkesë për raport dhe vlerësim të konvergjencës.
Sipas zv. ministrit të financave, data e ardhshme e synuar për anëtarësimin në eurozonë lidhet me zbatimin e reformave dhe një tendencë të qëndrueshme inflacioni.
“Shpresoj që parlamenti i ardhshëm të ketë largpamësinë euroatlantike për të miratuar ligjet e nevojshme. Problemi në parlamentin e kaluar, sa i përket ndryshimeve në ligjet e eurozonës, do të jetë aty në parlamentin e ardhshëm sepse qeveria është e vendosur të sjellë të njëjtat propozime legjislative që tashmë janë refuzuar. Prandaj, elita politike duhet të ketë një ide të qartë se ku dhe sa shpejt dëshiron që Bullgaria të shkojë drejt rrugës së integrimit ekonomik dhe politik”, theksoi Metodiev.
Discussion about this post