Kryeministri Edi Rama deklaroi pak javë më parë nga salla e Kuvendit se në 4 korrik priste një surprizë të madhe nga SHBA që do të gëzonte shumëkënd. Rama nuk dha asnjë detaj lidhur me suprizën e madhe që priste, ndërkohë që pati aludime të shumta.
Një ndër to ishte shpallja “non grata” e ndonjë tjetër politikani, por Rama e mohoi diçka të tillë duke thënë se vendime të tilla nuk ishin suprizë dhe as sillnin gëzime.
Një tjetër aludim ishte ndonjë vendim për liberalizimin e vizave nga SHBA për shqiptarët, por ambasadorja amerikane Yuri Kim, në konferencën e fundit për mediat që dha në Shqipëri, u shpreh se një vendim i tillë mund të vinte, pasi shqiptarët që ishin pajisur me viza 10-vjeçare po respektonin rregullat e lëvizjes.
Pak ditë më pas, në media u tha për vizitën në Tiranë të ish-Presidentit amerikan Bill Clinton.
Ish-Presidenti amerikan erdhi sot në vizitën e tij të parë në kryeqytetin shqiptar, ndërsa gjatë presidencës së tij, mori vendimin për të bombarduar Serbinë, duke ndalur kështu masakrat ndaj popullsisë shqiptare në Kosovë.
Bashkëshortja e Bill Clinton, Hillary Clinton, kishte vizituar Shqipërinë në 2010, kohë kur mbante detyrën e Sekretares amerikane të Shtetit, vizitë që u përmend edhe sot nga ish-Presidenti amerikan.
Po a është kjo surpriza e madhe që Edi Rama priste nga SHBA me datën 4 korrik?
Ndoshta, kjo është ajo çfarë Rama priste, edhe pse Shqipëria ka pasur luksin që të vizitohet nga një President në detyrë, George W. Bush, që shpalli pavarësinë e Kosovës dhe njëherazi dha lajmin për anëtarësimin e Shqipërisë në NATO.
Bush vizitoi Tiranën teksa vendi qeverisej nga Kryeministri Sali Berisha.
Ndërsa në vitin 1996, Shqipëria u vizituar nga ish-Presidenti George Bush, në një vizitë private në atë kohë.
Discussion about this post