Ditën e sotme në media u publikua lajmi se aksionet e klubit të Tiranës që janë në pronësi të Refik Halilit, janë zyrtarisht në shitje dhe brenda pak ditësh, mbyllet ankandi që do të dekretojë pronarin e ri të Tiranës me 66% të aksioneve.
Media që publikoi lajmin raportonte më tej se një zyrë përmbarimore ka bllokuar aksionet e familjes Halili në klub për shkak detyrimesh ndaj palëve të treta dhe tashmë i kanë nxjerr zyrtarisht në shitje ato, me ankandin që mbyllet më datë 22 prill, pra në mesjavën e ardhshme.
Por, pas këtij lajmi, ka ardhur një reagim nga Presidenca e klubit të futbollit të Tiranës, ku sipas saj, gjithçka është një dezinformim të qëllimshëm.
KF Tirana hedh akuza se ky dezinformim është pjesë e një skenari të qëllimshëm, totalisht spekulativ dhe me prapavijë dashakeqe dhe komploti, për të synuar tjetërsimin e aseteve të klubit.
“Klubi i Futbollit Tirana, nëpërmjet këtij reagimi, kërkon të sqarojë opinionin publik për një dezinformim të qëllimshëm, që është përhapur në media, për sa i përket falimentit të klubit! Ky lajm, është pjesë e një skenari të qëllimshëm, totalisht spekulativ dhe me prapavijë dashakeqe dhe komploti, për të synuar tjetërsimin e aseteve të KFT.
Ju bëjmë me dije se ekipi ligjor dhe stafi i klubit, është në dijeni të plotë të këtij skenari dhe ka marrë të gjitha masat, për ta bllokuar dhe denoncuar në të gjitha instancat ligjzbatuese përfshirë dhe hapat ligjorë te ndjekjes penale. Njëkohësisht, klubi thekson se këto janë çështje të cilat synojnë të dëmtojnë imazhin e Klubit më të suksesshëm në historinë e futbollit shqiptar, duke siguruar se nuk ka asnjë problem likuiditeti. Asnjë veprim abuziv dhe asnjë person, kushdo qoftë ai, nuk do mund të arrijë të realizojë skenarë që dëmtojnë interesat e Klubit të Futbollit të Tiranës si në aspektin administrativ, ashtu dhe në atë sportiv.
Sigurojmë të gjithë dashamirësit, tifozët, bashkëpunëtorët dhe partnerët, se Klubi i Futbollit Tirana, do të vazhdojë rrugëtimin e tij, për të arritur objektivat sportivë dhe se asgjë dhe askush, nuk mund dhe nuk do të cënojë ekzistencën, mbarëvajtjen apo edhe funksionimin e klubit.” – thuhet në reagimin e klubit KF Tirana.
Por, i kujt është ky qëllim dhe a është e përfshirë Bashkia e Tiranës, e drejtuar prej Erion Veliajt në këtë skenar?
Po ditën e sotme, një prej personave pranë Erion Veliajt, Eduard Prodani reagoi në rrjetet sociale, ku propozonte që ky 66% i aksioneve që i përkasin Refik Halilit, t’i kalonin Bashkisë së Tiranës, e cila është bashkëpronare në klub, dhe më pas kjo e fundit t’i nxirrte në ankand dhe t’i shiste 100% të aksioneve.
“Bej thirrje qe aksionet e KF “Tirana”, ne respekt te historise se Tiranes, futbollit shqiptar, transparencies dhe interesit publik, duhet t’i oftohen bashkeaksionerit te shoqerise KF “Tirana” sha qe eshte Bashkia Tirane. Ne kete menyre, pas marrjes se aksioneve, ne zbatim te ligjit dhe per te miren e futbollit, Bashkia mund te te beje shitjen e 100% te aksioneve ne nje ankand kesaj rradhe me kritere perzgjedhjeje te studjuara ne menyre te tille qe te garantojne freskimin e futbollit tone me sipermarres sportive te dedikuar me integritetin e nevojshem, kapacitetet dhe financa transparente.” – shkruante Prodani në reagimin e tij, që më pas u shpërnda nga mediat që mbështesin Erion Veliajn.
A qëndron në mes stadiumi “Selman Stërmasi” për kulla?
Kryebashkiaku i Tiranës, Erion Veliaj e ka përsëritur disa herë se stadiumi “Selman Stërmasi” do të marrë të njëjtën udhë si ish-stadiumi “Qemal Stafa”, sot “Air Albania”, për të sjellë rreth tij kulla dhe shërbime të tjera, si biznese, hoteleri apo edhe ambiente të tjera.
Stadiumi “Selman Stërmasi” është lënë të degradohet në gjendje të mjerueshme dhe prej kohësh është bërë i papërdorshëm, ku sot aty nuk luan askush, edhe pse është një stadium në mes të kryeqytetit. Stadiumi duket se është në fund të jetës së tij dhe i ka ardhur radha për kulla.
Për momentin stadiumi është pronë e Bashkisë së Tiranës dhe është në përdorim nga KF Tirana, edhe pse nuk luan askush aty.
Në media kanë qarkulluar më herët lajme se që plani për stadiumin me kulla të vihet në zbatim, Bashkia e Tiranës mendon që të shesë ato 34% të aksioneve që ka tek KF Tirana. Kjo do të sillte edhe ndryshimin e aksioneve tek KF Tirana.
Edhe pse 34% të aksioneve në klub, shpesh herë Bashkia e Tiranës është akuzuar se prej vitesh nuk ka dhënë asnjë lekë tek klubi i futbollit të Tiranës.
Mos ndoshta kur Presidenca e KF Tirana, citon fjalët “për të synuar tjetërsimin e aseteve”, e ka fjalën për stadiumin? Kjo mbetet për t’u parë dhe nëse a ka nisur një “luftë” për kullat e “Selman Stërmasit”.
Discussion about this post