A ka mundësi? Braçe shqetësohet nga zhurma në Komision. Përplaset me ministren

Ish-zv.kryeministri Erion Braçe ka humbur për një moment kontrollin gjatë fjalës së tij në Komisionin e Ekonomisë dhe Financave. Teksa fliste për ndryshime në paketën fiskale, gazetarët kanë nisur diskutimet me njëri-tjetrin me zë të lartë, duke shqetësuar socialistin.

Në atë moment, Brace indinjohet duke i kërkuar gazetarëve të pushonin për ta lënë të fliste.

“Sepse diskutimi është stërbërë. Dua të them dy gjëra. A e ul pak zërin po deshe? A mundem?,” -tha Braçe me zë të lartë në Komision.

Më herët, deputeti ka debatuar me kolegët socialistë, konkretisht ministren Delina Ibrahimaj, lidhur me diskutimet për projekligjin “Për Buxhetin e vitit 2022”. Ishte neni 1 i projektligjit për TVSH e inputeve bujqësore që ka përplasur dy socialistët, ku Braçe tha se taksat dhe tatimet nuk mund të rriteshin në kohë krize, duke kërkuar rishikimin e paketës fiskale.

Erion Braçe: Në nenin 1 të pr ligjit që ka sjellë qeveria bëni ndryshime në nenin 49, shkallët e reduktuara, dua të di pse keni shkuar drejtpërdrejt tek një favor bërë bujqësisë, pra heqjen e përjashtimit dhe vendosjen e një shkalle të re tatimi mbi vlerën e shtuar për inputet bujqësore, plehra pesticide, dhe s’jeni marrë me të tjera favore që janë në këtë nen e që kushtojnë shumë më tepër para se sa këto paratë që kanë dëmtuar ekuilibrin fiskal përmes inputeve bujqësore?

Ministrja Ibrahimaj: Ne gjatë këtij viti kemi pasur një tjetër mision të FMN që ende s’është përmbyllur, parë në këndvështrimin e pandemisë dhe krizës që kaluam. Rekomandimet e FMN janë me vite dhe sapo të finalizohet drafti i rekomandimeve të tyre ne do nisim një proces konsultimi për hartimin e strategjisë afatmesme të të ardhurave që do konsultohet me gjithë palët e interesit, sa i përket pyetjes pse bujqësia. 

Erion Braçe: Po e theksoj edhe njëherë se do na vijë kostoja e punës së bujkut. Nuk rriten tatimet dhe taksat kur rriten çmimet. Nuk ka vend në Europë, nëse ma gjeni që po diskuton paketë fiskale me taksa të rritura, ok tërhiqem unë kërkoj shumë ndjesë. Po sërish tek radha e favoreve, kemi rënë dakord që të hiqen të gjitha. Me tatime e taksa, me normë e procedurë.