Kreu i grupit parlamentar të Partisë Socialiste, Taulant Balla ka njoftuar se pasditen e nesërme do të mblidhet Këshilli për Mandatet dhe Rregulloren në Kuvend, ku do të diskutohet kërkesa e SPAK për t’i hequr imunitetin Alqi Bllakos.
Para gazetarëve, Balla tha se ka pasur komunikim me Bllakon, të cilit i lind e drejta që në mbledhjen e nesërme të bëjë mbrojtjen e tij para deputetëve.
“Kryetarja e Kuvendit ka thirrur nesër në 18:00 mbledhjen e Këshillit të Mandateve, është vënë në dijeni dhe vetë deputeti Alqi Bllako, procedura e Kuvendit do të vijojë pa asnjë pengesë, nga asnjë lloj forme imuniteti apo privilegji parlamentar. Ajo që po ju them, është se natyrshëm kam komunikuar me zotin Bllako, në cilësinë e kryetarit të grupit, dhe me kryetaren e Kuvendit, në funksion të ecjes përpara të procesit. Do ju ftoja që të shkoni në pjesën ku është arkiva e Kuvendit, dhe të shihni se çfarë standardesh ka përdorur PS dhe PD. Asnjë vonesë për të çuar përpara një arritje që Shqipëria e ka në mënyrë pa diskutueshme, Reformën në Drejtësi. Unë nuk interpretoj dokumente zyrtare, vetëm i lexoj, është një dokument që më është vënë në dijeni dhe kemi thirrur mbledhjen e këtij këshilli nesër në orën 18:00”, tha Balla.
Kërkesa për arrestimin e Bllakos, vjen pas hetime të SPAK ku është vërtetuar se deputeti dhe ish-ministri Lefter Koka kanë shfrytëzuar postin për favorizimin e kompanisë koncencionare për inceneratorin e Fierit, në këmbim të shumave të mëdha monetare.
Discussion about this post