Kryeministri Edi Rama tha se nuk ka asnjë frikë nga SPAK, ndërsa shtoi se ata që duhet të kenë frikë nga Prokuroria Speciale nuk duhet të jenë ata që firmosin, por ata që përfshihen në afera dhe korrupsion.
Rama tha se ai dhe qindra zyrtarë të shtetit firmosin, por nuk kanë pse të kenë frikë nëse nuk shkelin ligjin.
Kryeministri ka mbrojtur inceneratorët si një projekt që ka pastruar vendin, ndërsa tha se edhe sikur të kthehej pas në kohë do e bënte 100 herë të njëjtën gjë.
“Projekti i inceneratorëve dhe afera nuk kanë lidhje mes tyre”, tha Rama.
Ai mbrojti gjithashtu investimin që është bërë në Sharrë, për të cilën tha se ishte jo një emergjencë, por një katastrofë humanitare.
“Afera korruptive është qartësisht një aferë korruptive që po merret një organ që e kemi krijuar për këtë punë. Unë jam mbrojtësi dhe frymëzuesi i SPAK që t’i pijë ujin e zi çdo gjëje që ka marrë padrejtësisht në kurriz të popullit shqiptar. Sistemi po i çon (zyrtarët) para drejtësisë, por nuk bëhet sa hap e mbyll sytë. Ky funksionim i sistemit do të bëjë që njerëzit të mendohen 17 herë para se të bëhen pjesë e aferës.”, tha kryeministri.
Rama u pyet nëse ndjen përgjegjësi politike që ka emëruar këta ministra që janë sot në burg, ndërsa u përgjigj se ky është viti i dhjetë në qeverisje dhe ne flasim për ministra të 7 viteve më parë.
“Kjo është arritje e jashtëzakonshme për historinë e këtij vendi. Njerëzit që janë me pushtet nuk janë të paarritshëm nga drejtësia.
Përgjegjësia politike e imja është kjo që unë bashkë me të tjerët t’I krijojmë mundësitë këtij vendi. Të merr dhe të lidh drejtësia nëse t’i je zgjidhur nga zinxhirët e ligjit”, tha Rama.
Discussion about this post