A keni frikë se do hetoheni? Përgjigjet Edi Rama

Kryeministri Edi Rama i ftuar në emisionin Top Story në Top Channel me moderatore Grida Dumën, u përgjigj pyetjes nëse ka frikë se do të hetohet.

Rama tha se mes dy personash ka pasur marrëdhënie “merr e jep” e nuk ka pse çështja të lidhet me të.

Edi Rama: Kam arritur në një pikë që nuk më surprizon asgjë. Por mund të them që këtu nuk ka asnjë çështje, se po të kishte do e hapnin ata që nuk falin as presidentët e ish-presidentët. Që nuk ka çështje, as nuk diskutohet…

Grida Duma: Çështja është që janë marrë 225 mijë USD nga një shqiptaro-amerikan që është takuar në zyrën tuaj. Burimi duhet të hetohet?

Edi Rama: Neza nuk e ka takuar në zyrën time, kanë ardhur 2 shokë nga Amerika. Më kanë takuar mua këtu dhe janë kthyer në Amerikë, e mes tyre ka një marrëdhënie parash më jep-të jap, duhet të lidhet me mua?

Grida Duma: Vështirë e kam që Edi Rama nuk e di kush janë personat që i kanë hyrë në zyrë?

Edi Rama: E di shumë mirë kush hyn, po e përsëris, ish-zyrtari ka ardhur me Agron Nezën. Nuk i thosha duhet të dali jashtë ky se është nga Tropoja.  Edhe përsëri po të vinin, prapë do i takoja se nuk ka asgjë për të fshehur. Mbi të gjitha është zyrtar i lartë. Në 14 maj kjo do të jetë një kosto e shtuar për ata që e keqpërdorën.

Grida Duma: Asnjë shqetësim nuk ka Rama për çështjen McGonigal?

Edi Rama: Dola këtu se kjo është mundësia më e mirë duke u ballafaquar me përfaqësues mediash, të më ballafaqonin me një resht të aktakuzës, ku implikohet personi im. Thjesht nuk ka. Shqetësohem për faktin se katandia e atyre që po tentojnë ta kthejnë në histori është tallja më e madhe dhe cinizmi më i madh. Nuk mund të sajosh aktakuza, se do e shikojmë sa moment i madh do të jetë 14 maji.