Anulohet vetëm pas dy muajsh një tender me vlerë 5.3 milionë euro, i dhënë në mënyrë tepër të dyshimtë firmës “Salillari”. Në datën 12 maj 2025, një ditë pas zgjedhjeve parlamentare, Drejtoria e Përgjithshme e Burgjeve me në krye Klevis Qosen, shpalli fitues Pëllumb Salillarin në tenderin e majmë për të ndërtuar burgun e Kukësit.
Por, vetëm pas 2 muajsh, e njëjta drejtori ia ka anuluar në mënyrë të beftë, duke ngritur shumë pikëpyetje për të gjithë procedurën. A ka mashtruar firma në fjalë për dokumentet e paraqitura? A mos vallë ka paraqitur të dhëna të rremë? Përse ishte e vetme në garë?
Dokumenti i mësipërm është njoftimi i fituesit i Drejtorisë së Përgjithshme të Burgjeve në datë 12 maj 2025, drejtuar firmës “SALILLARI”. Objekti i tenderit ishte “projektimi dhe ndërtimi i IEVP Kukës”.
“Njoftojmë se, kanë qenë pjesëmarrës në procedurë këta ofertues me vlerat përkatëse të ofruara “SALILLARI” me vlerë 528.300.000 lekë pa TVSH” thuhej në dokument. Në fakt, oferta e firmës “Salillari” ishte sa 99.9 % e fondit limit. Firmat e tjera janë “hequr” nga kriteret, pasi asnjë prej tyre nuk i plotësonte.
Një tender i majmë me vetëm një ofertues, por edhe oferta vjen me të gjithë fondin limit. Dyshimet në atë kohë ishin se gjithçka ka qenë e paracaktuar dhe se dokumentet ishin bërë nga vetë firma.
“Me publikimin e këtij njoftimi, jeni i lutur të paraqisni sigurimin e kontratës, brenda 5 ditëve nga dita e marrjes/publikimit të këtij njoftimi. Në rast se nuk dorëzon sigurimin e kontratës brenda afatit përfundimtar, të përcaktuar në njoftimin e fituesit, atëherë autoriteti kontraktor do të konfiskoj sigurimin e ofertës dhe do të lidh kontratën me ofertuesin e renditur i dytë në klasifikimin përfundimtar” thuhej në dokumente.
Por, çfarë ndodhi më pas?! Në datën 14 korrik 2025, dy muaj pas shpalljes së fituesit, Drejtoria e Përgjithshme e Burgjeve nxori një njoftim anulimi për këtë tender. “Arsyet e anulimit është “nëse asnjë nga ofertat e paraqitura nuk përputhet me kriteret e përcaktuara në dokumentet e tenderit”.
Nëse “Salillari” u shpall fituese dhe brenda 5 ditëve duhet të bënte sigurimin e kontratës, përse u anulua? Me çfarë dokumentesh kishte mashtruar firma tepër e preferuar në koncesione, tendera, fotovoltaikë, gërryerje lumenjsh e malesh?
Në dokumente nuk jepen detaje të tjera, por rasti meriton një verifikim të plotë të të gjithë procedurës. Që nga hartimi i dokumenteve standarde, shpallja, fituesi apo edhe sigurimi i kontratës. Duket se një mori zyrtarësh të Burgjeve dyshohet se kanë shkelur procedurat, ndërkohë që hetime të mundshme mund të evidentojnë të gjitha parregullsitë. Dokumentet janë të hapura dhe mjafton një verifikim apo hetim dhe të gjitha do të dalin në dritë.
/voxnews
Discussion about this post