A mund të pezullojë Franca vizat për Kosovën? KE rrëzon Macron

Emmanuel Macron, President i Francës, paralajmëroi Kosovën gjatë vizitës së tij në Tiranës, se liberalizimi i vizave për qytetarët e saj, mbetej një proces i hapur, edhe pse Komisioni Europian ka vendosur që nga 1 janari 2024, ata mund të udhëtojnë pa viza në hapësirën Schengen.

Deklaratat e Macron u përforëcuan edhe nga Kryeministri Edi Rama, i cili mbrëmjen e së enjtes, nga emisioni “Opinion” tha se Presidenti francez është i prerë në qëndrimin e tij, ndërsa i kërkoi Kosovës që të mos humbasë mundësinë e artë, sikundër e cilësoi Kreu i Qeverisë, planin franko-gjerman.

Por sa mundësi ka një shtet, qoftë kjo edhe Franca që të pezullojë liberalizimin e vizave për qytetarët e Kosovës?

Zëdhënësja e Komisionit Europian për Punët e Brendshme, Anitta Hiper pasi u pyet nga A2 CNN, nëse Franca ka propozuar pezullimin e liberalizimit të vizave të Kosovës, tha se liberalizimi i vizave për qytetarët e Kosovës do të hyjë  në fuqi më 1 janar të vitit 2024 dhe do t’i lejojë ata që të udhëtojnë brenda hapësirës së Bashkimit Europian për 90 ditë.

Përpos kësaj, në përgjigjen e tij, Komisioni Europian sqaron se shtete të veçanta nuk mund të vendosin që të pezullojnë një regjim të lëvizjes pa viza pasi ky i fundit është vendosur.

Vendime të tilla, siç sqaron KE për A2 CNN, mund të merren vetëm nëse kanë një konsensus të plotë në nivel të Unionit.

“Ne jemi në kontakt me të gjitha shtetet anëtare të Bashkimit Euopian dhe nuk bëjmë komente mbi komentet.

Në prill 2023, Parlamenti Europian dhe Këshilli adoptuan rregulloren 2023/850 të (BE), duke u hequr mbajtësve të Pasaportës së Kosovës, regjimin e vizave.

Liberalizimi i vizave për shtetasit e Kosovës do të hyjë në fuqi në 1 janar të vitit 2024. Do t’ u lejojë qytetarëve të Kosovës që të udhëtojnë në hapësirën e Bashkimit Europian pa viza për 90 ditë në çdo periudhë kohore prej 18 ditësh.

Komisioni ka vlerësuar që nga korriku 2018 se Kosova i përmbush të gjitha standardet e Udhërrëfyesit për Liberalizimin e Vizave. Kosova ka punuar vazhdimisht për të përmbushur standardet.

Shtete të veçanta anëtare nuk mund të vendosin të pezullojnë një regjim pa viza. Rregullat në lidhje me dhënien, pezullimin ose përfundimin e përjashtimeve të vizave janë plotësisht të harmonizuara në nivel të BE-së dhe kërkojnë vendime në nivel të BE-së”, tha Anitta Hiper, zëdhënësja e Komisionit Europian për Punët e Brendshme.