Ermonela Felaj, deputete e PS-së, u shpreh mbrëmjen e sotme se Kongresi i PS-së do të mbahet më 8 dhjetor.
Në një intervistë për Klan News, Felaj tha se vendimi është marrë nga Edi Rama, ndërsa Kongresi do të mbahet në Pallatin e Kongreseve.
Kongresi i socialistëve vjen në një kohë kur disa nga figurat e PS-së së Rilindur po përballen me drejtësinë. Së fundmi listës së personave që po hetohen i është shtuar edhe ish-ministri i Shëndetësisë, Ilir Beqaj.
Por kjo për Ermonela Felajn nuk ka pse të shqetësojë PS-në.
“Nuk di pse duhet të ndryshojë diçka në Partinë Socialiste për shkak që anëtarë të Partisë Socialiste, apo simpatizantë, apo kushdo qoftë ka të bëjë në një moment të caktuar me prokurorinë dhe gjykatën. Unë dua të përsëris që ne kemi qenë të qartë për të gjitha komplikimet që mund të sillte reforma e drejtësisë sepse duke qenë se jemi ne në pushtet që në vitin 2013 është e qartë që kompetenca e prokurorisë dhe Gjykatës së Posaçme që u krijua për shkak të reformës në drejtësi është një kompetencë që shtrihet tek funksionarë dhe zyrtarë të partisë në pushtet”, tha ajo.
Felaj shtoi se provat tregojnë që tani duhet të kenë frikë sepse në të kaluarën dihej se si zgjidheshin prokurorët dhe gjyqtarët, dihej sesi politika intervenonte në punën e prokurorëve dhe gjyqtarëve.
“Ne planifikojmë që partinë ta sjellim në një stad tjetër pune, në një stad tjetër organizimi sepse koha e mbajtjes së zgjedhjeve të përgjithshmë sa vjen dhe po ngushtohet dhe ne duhet të na gjejë të përgatitur”, tha ajo.
Discussion about this post