Altin Dumani, kreu i SPAK, zhvilloi një bashkëbisedim informal me gazetarët, të cilët e kanë pyetur në lidhje me çështje të ndryshme apo dosjet sensitive që janë në duart e prokurorëve të Prokurorisë Speciale.
Gjithsesi në shumicën e rasteve, duke ruajtur edhe sekretin hetimor, Dumani është përgjigjur shkurt, pa dhënë detaje mbi atë se çfarë po ndodh me njerëzit e politikës apo të tjerë, që konsiderohen si të paprekshëm.
Duke e quajtur vendimin e GJKKO-së për çështjen e inceneratorit të Fierit, si të drejtë, Dumani tha se “në burg kemi një ish ministër dhe një ish deputet. Jam i kënaqur me këtë.”
Por ai u pyet edhe për dosjet që përfshijnë ish-kryeministrin Sali Berisha dhe ish-presidentin Ilir Meta.
Në lidhje me çështjen “Gërdeci”, Dumani tha se çështja është ende në hetim. “Çështja është në hetim. Nuk mund të them më shumë”, tha Dumani.
Ai u pyet a ka patur letër porosi për Gërdecin. “Kemi nisur një letër porosi, jemi duke bashkëpunuar me SHBA-në”, theksoi ai.
Në rastin e ish-Presidentit Meta, Dumani tha se “jemi në pritje të një letërporosie tjetër nga SHBA-ja, siç është ajo ndaj ish- presidentit Ilir Meta dhe anëtarëve të familjes së tij”.
Gjithashtu Dumani tha se ajo që njihet si çështja e kompleksit Partizani është në fazë hetimi.
Dumani u pyet nëse do të arrihet modeli i Rumanisë për hetimet në nivele të larta politike. Ai u shpreh se mund edhe të tejkalohet.
“Do të hetoni ish- ministra ish dhe ish- zv. kryeministra?” – “Pse jo”, shtoi Dumani.
Discussion about this post