Që sheqeri i tepërt është i dëmshëm për shëndetin është diçka që dihet, mirëpo zëvendësimi me ëmbëlsues artificialë është diçka e diskutueshme. Së fundmi, një studim në shkallë të gjerë ka theksuar rrezikun që konsumimi i ëmbëlsuesve artificialë mund të ketë për shëndetin dhe përkatësisht zhvillimin e kancerit.
Studiuesit francezë hulumtuan zakonet e të ngrënit dhe shëndetin të më shumë se 100,000 vullnetarëve gjatë një dekade. Rezultatet e analizave statistikore, të botuara javën e kaluar në revistën PLOS Medicine, sugjerojnë që njerëzit që konsumonin ëmbëlsues artificialë – veçanërisht aspartam dhe acesulfame-K, të cilat përdoren zakonisht në pije joalkoolike – kishin më shumë rrezik për të patur kancer, më konkretisht kanceret e gjirit dhe ato që lidhen me obezitetin.
“Ky studim i mundshëm në shkallë të gjerë sugjeron se ëmbëlsuesit artificialë, të përdorur në shumë ushqime dhe pije në Francë dhe në mbarë botën, mund të përfaqësojnë një faktor rreziku në rritje për kancerin,” tha Charlotte Debras, studente doktorature dhe autore kryesore e studimit.
Ajo vuri në dukje se të dhënat ishin në përputhje me studimet e kaluara eksperimentale që sugjeronin një efekt të mundshëm kancerogjen te brejtësit.
Studimi zbuloi se njerëzit që konsumonin më shumë ëmbëlsues prireshin të ishin më shpesh gra, në moshë të re, të pinin duhan, të ishin më pak aktive fizikisht dhe më shumë të ngjarë të kishin diabet.
Autorët thonë se studimi i tyre duhet të ndezë hetime dhe debate të mëtejshme.
Discussion about this post