Dritan Abazoviç, ish-Kryeministri i Malit të Zi, është shfaqur në një takim me Milorad Dodik, i sanksionuar nga SHBA si “non grata” dhe i konsideruar si një separatist në Bosnje.
Foton e takimit të Abazoviçit me Dodikun është publikuar nga studiuesi i shkencave politike, njohësi i çështjeve të rajonit dhe njëkohësisht korespodent i Aljazeera për Ballkanin, Jasmin Mujanoviç. Nuk dihet se pse Abazoviç dhe Dodik ndodhen në takim.
“Ish-kryeministri “reformist” malazez @DritanAbazovic shihet duke u takuar me Dodikun, ultranacionalistin dhe separatistin serboboshnjak në Bosnjë Hercegovinë. Ka qenë e qartë prej ca kohësh që Abazoviçi ka qenë një Kalë Troje, një bashkëpunëtor i partive nacionaliste serbe të kontrolluara nga Beogradi në Podgoricë”, shkruan Mujanoviç në postimin e tij.
Montenegro’s former “reformist” PM @DritanAbazovic seen meeting w/ Bosnian Serb ultranationalist and secessionist Dodik in BiH. It’s been clear for a while that Abazovic was a Trojan Horse figure, actually in bed w/ the Belgrade controlled Serb nationalist parties in Podgorica. https://t.co/psQMHI5wjd
— Jasmin Mujanović (@JasminMuj) January 13, 2024
Dodik pak ditë më parë krijoi reagime të forta nga SHBA dhe BE, pas paralajmërimeve se do të ndante Bosnje Hercegovinën.
Udhëheqësi nacionalist i rajonit serb të Bosnjës më pas u tërhoq nga planet e tij dhe thirrjet e mëparshme për një ndarje të Bosnjes.
Në vitin 2021, Milorad Dodik, presidenti pro-rus i Republika Srpska (RS), shkaktoi krizën më serioze politike që nga lufta e viteve 1992-95, kur tha se do të tërhiqte rajonin nga institucionet kryesore shtetërore të Bosnjës, si gjyqësori, sistemin e taksave dhe forcat e armatosura të përbashkëta.
“Ne nuk po bëjmë thirrje për revolucion. Ne nuk po përgatitemi për luftë, ne po përgatitemi për vendime politike në nivelin e parlamentit shtetëror dhe në nivelin e parlamentit të Republikës Srpska,” tha Dodik.
Dodik ka qenë nën sanksionet e SHBA-së dhe Britanisë për akte që minojnë integritetin e marrëveshjeve të Dejtonit dhe vënë në rrezik paqen e vendit të Ballkanit Perëndimor.
“Sanksionet kundër meje janë pjesë e luftës hibride që po zhvillohet kundër Republikës Srpska,” tha Dodik, duke akuzuar diplomatët e huaj që punojnë në Bosnje si anti-serbë.
Në anën tjetër Dritan Abazoviç, gjatë kohës që mbante postin e Kryeministrit të Malit të Zi, iu bashkua nismës “Open Balkan”, duke u bërë vendi i 4-rt pas Shqipërisë, Serbisë dhe Maqedonisë që i bashkohej projektit të mbështetur nga Soros. Abazoviç njihet si një prej miqve dhe mbështetësve të Kryeministrit Edi Rama, madje nuk ka kursyer elozhet ndaj tij duke e quajtur edhe “babain e kombit”.
“E meriton me quajt baba i kombit. Për një imazh të mirë të shqiptarëve. Shqipëria ka arrit të jetë në Këshill të Sigurimit të udhëheq mbledhjet ku marrin pjesë shumica e shteteve të botës. Janë gjëra historike për Shqipërinë dhe imazhin e shqiptarëve në botë. E ka sjell Procesin e Berlinit për herë të parë në Tiranë”, shprehej Abazoviç pak kohë më parë.
Discussion about this post