Abetarja e unifikuar ekziston që nga 100-vjetori i Pavarësisë, Kurti dhe Rama premtojnë krijimin e saj

Ministrja e Arsimit, Evis Kushi deklaroi para disa ditësh se një nga pikat e marrëveshjes mes qeverisë së Kosovës dhe Shqipërisë, pas mbledhjes së shtatë të përbashkët qeveritare mes dy shteteve, do të vihet në zbatim.

Bëhet fjalë pikërisht për unifikimin e tekstit të abetares për nxënësit e klasave të para.

“Sot kemi vendosur që nga kjo procedurë të përjashtohet teksti i abetares. Që do të thotë të gjithë nxënësit në klasën e parë të kenë një tekst të unifikuar. Kemi dakordësuar që për abetaren të kemi një tekst të unifikuar. Kjo sjell qasje dhe metodologji të njëjtë. Do të vijojmë për këtë projekt, një gjuhë, një abetare”, tha ministrja.

“Ne kemi dakordësuar në qeveri në mbledhjen e fundit që të punojmë që në vitin e ardhshëm që është dhe jubilar për pavarësinë e vendit tonë, të kemi gati Abetaren e unifikuar. Abetarja është një libër themelor për këdo që hyn në rrugën e arsimit dhe prej shumë vitesh tanimë është një libër i cili, bazuar edhe në ligjin e arsimit që ne kemi, njësoj si librat e tjerë është trajtuar si një tekst me shumë alternativa. Ajo që ne kemi dakordësuar është që të kemi vetëm 1 Abetare.”, u shpreh kryeministri Rama në mbledhjen e qeverisë.

Por duket se zyrtarët aktual kanë harruar historinë e diplomacisë mes dy vendeve dhe as nuk kanë marrë mundimin të studiojnë pikat e marrëveshjes që u shitën se arritje në përmisimin mes dy vendeve, pika të cilat historia ka treguar se kanë mbetur jo pak herë vendime të marra në letër, por jo të aplikuara në praktikën mes dy vendeve.

Në 100-vjetorin e pavarësisë së Shqipërisë u hartua abetarja e unifikuar mes dy vendeve, që nënkupton se kjo pikë ekziston dhe kjo pohohet dhe nga vet autori i kësaj abetareje të përbashkët.

Autori i abetares së përbashkët, Shezai Rrokaj mendon se nuk duhet të nis puna nga e para me ndryshimin e emërtimeve por puna të vazhdojë me përmirësimin e tekstit shkollor.

“Ky është vullnet politik. Por nuk mund të hidhet puna poshtë e njerëzve, se me këtë abetare mësojnë fëmijët shqiptarë. Pse jo të bashkohemi për të bërë më të mirën ne jemi të gatshëm.”

Ndërkohë me zbatimin e kësaj pike mësuesit nuk do të kenë më mundësinë e përzgjedhjes së teksteve në lëndën e abetares, me qëllimin për të patur një gjuhë dhe një abetare shkollat shqiptare. Përtej kësaj, ekspertët e arsimit e shikojnë zgjidhjen jo te konkursi por te bashkëpunimi mes akademikëve më të mirë nga diaspora.