“Absurde! Në 2025 ujë me orar”, Këlliçi: Ky është realiteti i 12 viteve vjedhje nga qeveritë Rama

Drejtuesi politik i PD-së për Tiranën, Belind Këlliçi ka zbitur në terren në kryeqytet ku po zhvillon takime me qytetarët.

Ajo që has nga takimet me qytetarët është shqetësimi për një sërë problematikash si ajo e ujit me orar, gjë të cilën e quan absurde.

Kjo sipas Këlliçit vjen si pasojë e 12 viteve vjedhje dhe keqmenaxhim nga qeveritë Rama.

“Në çdo rrugë dhe çdo shtëpi të Degës Nr. 2 në Tiranë, temat kryesore janë problematikat serioze: uji me orar, rrugë të rrënuara, emigrim masiv dhe vështirësi të jetuari me punë e biznes të ndershëm.

Është absurde të mendosh që në lagjet e Tiranës në vitin 2025 uji të vijë me orar, 2 orë në mëngjes e 2 në darkë, por ja që ky është realiteti i 12 viteve vjedhje dhe keqmenaxhim nga qeveritë Rama.

Bashkë me bizneset e vogla, faktori kryesor i vetëpunësimit dhe ekonomive familjare në zonë, folëm për emergjencën e lehtësimit të tyre nga gjobat dhe taksat, mbytëse për sipërmarrjen dhe rritjen ekonomike.

Partia Demokratike siguron qytetarët se mandati i saj qeverisës do të jetë krah tyre: me infrastrukturë në qendrat e banimit, me shërbime efikase në institucione, me investime serioze që rikthejnë në komunitet vlerën e shtuar dhe zhvillimin për të gjithë.

Ndryshimi është i mundur, dhe ai do të vijë nga vullneti i qytetarëve i shprehur me votë masive në 11 maj!”, shkruan Këlliçi.