Për hir të përfitimeve nga fondet, po abuzohet me shëndetin e fëmijëve të çerdheve. Shqetësimi i prindërve është lidhur shpesh me ushqimet që konsumojnë fëmijët e tyre në kopshte dhe çerdhe. Fjala është për tenderët e ushqimeve. Mishi, orizi, djathi, makaronat, ushqime që, sipas prindërve, pavarësisht standardit të Ministrisë së Shëndetësisë lidhur me kaloritë që duhet të marrin fëmijët në një vakt ushqimor, janë të pakonsumueshme, të skaduara ose blihen në mënyrë abuzive, duke rrezikuar seriozisht shëndetin e të vegjëlve.
Një situatë e tillë po ndodh në Bashkinë e Kavajës, kryetari i së cilës vazhdon të këmbëngulë në një tender që është anuluar dy herë për abuzime dhe parregullsi.
Konkretisht, bëhet fjalë për tenderin me objekt “Furnizimi me ushqime për kopshte, çerdhe dhe konviktorë”, që mban firmën e Fisnik Qoses.
Në dokumentet standarde të tenderit tregohet se do të blihen 55 artikuj ushqimorë të ndryshëm, ku për secilin përcaktohet si duhet të jetë paketimi.
Por, në asnjë pikë të tenderi nuk tregohet se si do të bëhet kontrolli për sigurinë e këtyre produkteve. Deri më tani nuk ka asnjë ofertues dhe asnjë fitues për këtë tender. Kjo vjen për shkak se dokumentet mbi kriteret kanë probleme. Duke parë problemet e këtij prokurimi, Open Data Albania e ka shënuar me “Flamur të kuq”
Dhe me sa duket, për shkak të prapaskenave që thur Bashkia Kavajë, të vegjlit mund të mbeten pa ushqime në kopshte dhe çerdhe.
Por, edhe në ato raste kur bëhet furnizim, sikur e përmendëm pak më lartë, është i pasigurtë dhe jo i shëndetshëm.
Ankesat e prindërve kanë të bëjnë kryesisht me standardet e produkteve ushqimore që konsumojnë të vegjlit. Prindërit pohojnë se fëmijët e tyre kanë refuzuar ushqimin që iu gatuhet në mensat e këtyre institucioneve publike. Orizi nuk zien, makaronat nuk kanë shije, fasulet nuk ziejnë, janë të përziera, djathi nuk ka shijen e tij karakteristike. Në shumë raste edhe mishi nuk është i konsumueshëm.
Ndërsa, fëmijët kanë shumë ankesa në lidhje me produktet ushqimore që u serviren nga kuzhinat e çerdheve dhe të kopshteve, ndërsa nxënësit më të rritur të konvikteve të shkollës së Mjeshtërisë Sportive dhe asaj profesionale, pothuajse e kanë braktisur mensën e konvikteve.
Lexo edheFisnik Qosja: Ja pse Bashkia e Kavajës paguan inceneratorin e Tiranës
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post