Kryebashkiaku i Krujës, Artur Bushi, është nën hetim nga SPAK për disa ndërtime pa leje, por ai vazhdon me afera korruptive nën hundën e Prokurorisë. Pak ditë më parë Gijotina.com tregoi lëvizjet e paligjshme të bëra me disa kontrata për asfaltimin e rrugëve. Ndërkohë sot do të publikojmë dy kontrata të tjera që janë gjithashtu në shkelje të ligjit dhe do të shpërdorojnë 173 milionë lekë nga xhepat e taksapaguesve krutanë.
Tenderi i parë ka si objekt “Sistemim-asfaltim i rrugës “Albanopolis” (Lagja Sallake), Krujë”. Për të hedhur një shtresë asfalti në këtë rrugë, Bushi do të shpenzojë 85 milionë lekë. Ndryshe nga kontratat e tjera, këtë projekt Bushi planifikon që ta përfundojë deri në fillim të majit 2023, pasi ka lënë afat 40 ditë.
Ndërkohë e përbashkëta është se edhe këtë tender e ka dhënë pa garë, duke ia falur biznesmeni të privilegjuar të pushtetit.
Për këtë tender kanë paraqitur oferta firma “Bami shpk” dhe ‘’K.TURJA shpk”. Kjo e fundit ka pasur ofertën më të lirë, por është skualifikuar që në vlerësimin e ofertave me argumentin se nuk ka paraqitur në kohë sigurimin e kontratës.
Kështu, në garë mbeti vetëm kompania e biznesmenit Besnik Bami. Ky i fundit firmosi kontratën dhe xhiroi në arkën e biznesit 85 milionë lekë pa asnjë lloj konkurrence. Rezultati që presim është një shtresë asfalti që do të hidhet në këtë rrugë, se të paktën kaq parashikon kontrata. Investimi, referuar rasteve të ngjashme, mund të bëhej me një vlerë edhe më të lirë.
Dhuratat e Bushit për Bamin nuk mbarojnë
Në të njëjtën ditë, Bushi ka firmosur një tjetër tender për Bamin. Bëhet fjalë për prokurimin me objekt “Sistemim-asfaltim i rrugëve “Cacëve”, “Xhafëve” dhe “Stafukëve Fushë”, fshati Larushk. Edhe për këto rrugica të fshatit Larushk, Bushi pret t’i mbyllë punimet në fillim të majit. Këtu vlera e vënë në dispozicion është 88 milionë lekë.
Sërish një vlerë shumë të lartë për asfalt në 3 rrugica. Këtë e tregojnë edhe ofertat e operatorëve, të cilët tregojnë se mund të mbyllin këtë projekt me 60 milionë lekë. Por, sërish Bushi ka dashur të shpenzojë më shumë dhe ka zgjedhur ofertën e “Bami shpk” me vlerë 65 milionë lekë.
Gjithsesi për kryebashkiakun Bushi ka rëndësi të nënshkruajë sërish me Besnik Bamin, të tjerat nuk i interesojnë.
Kështu, në shkelje të ligjit, Bami futi në xhepin e kompanisë brenda një dite 173 milionë lekë nga Bashkia Krujë.
Besnik Bami është rikthyer sërish në sagën e përvetësimit të tenderëve. Ndërsa emri i tij është mjaft i lakuar për përfitime përmes prokurimeve të paligjshme. Vetëm për vitin që lamë pas Bami shpk ka rrëmbyer 18 tenderë pa garë, të cilat nga Open Data Albania janë listuar te kontratat me “Red Flag”. Pjesa më e madhe janë nga Bashkia Tiranë.
Nuk duhet të harrojmë edhe miliona eurot e marra nga projekti për Aeroportin e Kukës, i cili ende nuk plotëson kërkesat e shënuara sipas kontratës koncesionare.
“Bami” sh.p.k. në bashkëpunim me firmën “Global Technical Mechanichs” u shpallën fitues të tenderit me objekt “Zgjerimin e aeroportit të Kukësit dhe operimin për 35 vjet të tij me koncesion”.
Lexo edhe: Artur Bushi i fal tenderin për asfalt Besnik Bamit, oligarkut të aeroportit Kukës
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post