Anulohet tenderi i firmosur nga Kryetari i bashkisë Vlorë, Ermal Dredha për pastrimin e qytetit të Orikumit. Jo vetëm që kryetari e la pa e pastruar qytetin gjatë sezonit turistik, plehrat janë bërë mal në hyrje të Orikumit duke krijuar erë të padurueshme për banorët, por tenderi manipulohet dhe zvarritet.
Bashkia Vlorë e ka hapur tender në muajin shtator 2024 me objekt “Shërbimi i pastrimit të njësisë administrative Orikum”, që parashikohej të mbahej më datë 23 shtator 2024, por procedura ka ngecur për shkak të një denoncimi.
Përpara se të analizojmë ankesën e bërë në KPP dhe vendimin e marrë për tenderin, duhet të përmendim disa absurditete që përmban formulimi i tenderit.
Në preventiv thuhet se pastrimi do të bëhet për vitin 2024, ashtu sikur është emërtuar edhe objekti i tij, mirëpo Dredha është kujtuar në gusht të hapë prokurimin.
Kështu muajt e tjerë, madje ato më kryesorët gjatë sezonit të plazhit, Orikumi vazhdoi me situatën e rënduar të pastrimit.
Gjithashtu thuhet se kontratat vlen për 365 ditë, mirëpo në tabelë është shënuar 12 muaj me nga 31 ditë secili, çka i bie mbi 370 ditë. Këto mund të jenë lapsuse, pasi dihet që në komisione qëndrojnë persona të pakualifikuar për prokurimet.
Por fakti që viti po mbyllet dhe tenderi ende nuk është mbyllur, tregon shumë për abuzimin që bën Dredha me buxhetin e bashkisë.
Prandaj në tetor firma “Silver” SHPK ka denoncuar pranë Komisionit të Prokurimeve Publike këtë tender, me argumentin se ka gabime në përllogaritjet e kostove për disa zëra, si dhe janë vendosur kritere që diskriminojnë operatorët dhe favorizojnë një operator që mund të jetë pikasur si fitues.
Në datë 15.10.2024, Komisioni i Prokurimit Publik mori vendimin Nr. 1443/2024, ku vendosur të pranojë pjesërisht ankesën e “Silver” SHPK dhe i kërkoi Dredhës të bëjë disa modifikime në tender që janë në kundërshtim me ligjin. Më datë 30 tetor, Bashkia ka siguruar komisionin se ka vënë në zbatim rekomandimet dhe ka bërë ndryshimet e nevojshme.
Por në fakt nuk ka ndodhur ashtu!
“Referuar sistemit të prokurimit elektronik rezulton se shtojca për modifikimin e dokumenteve e tenderit është publikuar në sistemin e prokurimit elektronik por ajo nuk është tërësisht në përputhje me vendimin nr.1443/2024, datë 15.10.2024 të KPP-së”, shprehet KPP ne vendimin e saj.
Prandaj edhe njëherë në këtë vendim të fundit theksohet se Autoriteti Kontraktor nuk ka respektuar ligjin në pikën ku është bërë analiza e kostos për zërin ngarkim dhe transportim i mbeturinave.
Një zë i rëndësishëm ky dhe që gjë përfshinë një vlerë të konsiderueshme në shpenzime.
“Duke e analizuar në këtë këndvështrim dhe pas njohjes me zërat e preventivit dhe analizën e kostos të dërguar nga autoriteti kontraktor për procedurën konkrete të prokurimit dhe ku njësitë e vetëqeverisjes vendore janë të ngarkuara për ndjekjen dhe zbatimin e këtij vendimi, KPP vëren se analiza e kostos për zërin ngarkim transport mbeturina i cili hyn në fushën e përgjegjësisë së këtij akti nënligjor nuk është hartuar në përputhje me parashikimet e tij. Për sa kohë që llogaritja e kostos për zërat që lidhen me menaxhimin e mbetjeve gjejnë rregullim të posaçëm përmes aktit më sipër, autoriteti kontraktor si njësi e vetëqeverisjes vendore duhet të marrë masa që t’i qëndrojë strikt këtij rregullimi dhe të hartojë preventivin për zërat që lidhen me menaxhimin e mbetjeve siç parashikon akti nënligjor me sipër”.
Bashkia Vlorë nuk i ka respektuar këto rekomandime po vazhdon të mbajë dokumentet me gabime në përllogaritjen e zërave. Kështu që më datë 4 nëntor 2024 është vendosur të anulohet tenderi. Komisioni i bën thirrje Dredhës të mos vazhdojë në asnjë mënyrë me procedurat. Kështu Orikumi do ta mbyll këtë vit me mbeturina nëpër rrugë!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post