Gjykata e Posaçme e Apelit la në fuqi masën e arrestit me burg për ish-ministrin e Shëndetësisë, Ilir Beqaj. Edhe për 6 të tjerë të akuzuar për çështjen e SASPAC u la në fuqi masa e sigurisë. Të vetmes që iu ndryshua masa ishte Marinela Jazoi të cilës Apeli ia ndryshoi masën nga procedim në gjendje të lirë, në detyrim paraqitjeje.
Ilir Beqaj akuzohet nga SPAK për korrupsion pasiv, mashtrim, shkelje të barazisë në tendera dhe shpërdorim detyre.
Ish-ministri Beqaj, njëkohësisht ish-drejtor i SASPAC kërkoi një masë më të butë sigurie. Në një seancë të zhvilluar dy ditë më parë, ish-ministri ofroi një garanci pasurore prej 5 milionë Lekësh dhe kërkoi që masa e sigurisë nga arrest me burg të kalonte në arrest shtëpie.
Kjo kërkesë nuk u pranua nga gjyqtarët e Apelit.
Hetimet e Prokurorisë së Posaçme zbuluan se Agjencia e Koordinimit të Fondeve të Huaja ku Beqaj ishte drejtues, ka abuzuar me të paktën 8 prokurime.
Mes tyre një tender për ceremoninë e mbylljes së turizmit të qëndrueshëm, ku fondi i vënë në dispozicion ishte shumë i lartë.
Kjo festë është zhvilluar në restorantin Gzona, ku gruaja e tij ka patur 15% të aksioneve, të cilat më pas i ka shitur apo dhuruar. Hetimi për zbulimin e kësaj skeme nga SPAK nisi paralelisht me dosjen e sterilizimit ku ish-ministri i Shëndetësisë është po në akuzë për shpërdorim detyre.
Discussion about this post