8 muaj pasi dosja për ish-kreun e Urdhrit të Stomatologut, Nikoll Deda kishte kaluar për gjykim, ai është arrestuar me kërkesë të prokurorit të Tiranës, Bledar Valikaj. Blutë kanë ekzekutuar masën e arrestit me burg për 70-vjeçarin, pas dyshimeve të organit të akuzës se ai mund të pengojë hetimin apo t’i shmanget drejtësisë.
Në nëntor 2024, dosja ndaj Dedës kaloi për gjykim, i akuzuar për 3 akuza “Vjedhje e kryer duke shpërdoruar detyrën”, “Shpërdorim detyre” dhe “Veprime në kundërshtim me vendimin e gjykatës. Ai u denoncua nga një qytetar, ndërsa dyshohet se ka abuzuar me fondet dhe se ka punësuar familjarët e tij.
Prokuroria e Tiranës thotë se 70-vjeçari i është veprimeve hetimore të kryera nga policia gjyqësore duke e bërë evident e konkret rrezikun e ikjes dhe shmangies nga përgjegjësia penale.
“Pavarësisht se është marrë i pandehur dhe është aktualisht në proces gjyqësor i akuzuar për nenin 320 të Kodit Penal në një tjetër procedim, ka ndërmarrë veprime aktive në shpërdorim të detyrës për përqendrim të mëtejshëm të kompetencave në duart e tij duke shfrytëzuar strukturat e USSH-së.
Organi i Prokurorisë vlerëson se është e nevojshme marrja e masës së sigurimit personal ndaj shtetasit Nikoll Deda, pasi ekzistojnë shkaqe të rëndësishme që vënë në rrezik marrjen ose vërtetësinë e provës dhe ekziston rreziku që ai të largohet”, njofton Prokuroria e Tiranës.
Sipas hetimeve, Deda dyshohet se ka rritur në mënyrë të pajustifikuar buxhetin e Urdhrit të Stomatologut nga viti në vit. Në vitin 2020 buxheti ishte 38.5 milionë lekë, ndërsa në vitin 2021 ai u shtua me 13.5 milionë lekë. Në vitin 2022, buxheti arriti në 125.8 milionë lekë, për shkak edhe të blerjes së një godine të re për institucionin dhe investimeve të kryera në të. Prokuroria dyshon se këto shtesa janë kryer për përfitime personale dhe jo në funksion të interesit publik.
Gjithashtu, Deda akuzohet se ka punësuar familjarë dhe të fejuarat e djemve, pa ndjekur asnjë kriter ligjor, me qëllim forcimin e kontrollit personal mbi institucionin dhe ndikimin në vendimmarrjet e Këshillit Kombëtar.
Discussion about this post