Ka nisur në Bretagna të Francës gjyqi ndaj një kirurgu 74-vjeçar në pension i cili akuzohet për përdhunim dhe sulm seksual ndaj qindra pacientëve të rinj, shumica prej të cilëve ishin nën anestezi. Ky është rasti më i madh i abuzimit seksual të fëmijëve në Francë, që ka tronditur vendin. Joel Le Scouarnec, përballet me akuza për përdhunim të rëndë dhe sulm seksual kundër 299 të miturve, ndërsa 256 prej tyre ishin nën 15 vjeç. Kur Le Scouarnec përfitoi prej tyre ata ishin në gjumë ose në proces zgjimi.
Kirurgu 74-vjeçar pranoi përgjegjësinë e tij në shumicën e përdhunimeve dhe sulmeve seksuale për të cilat do të duhet të përgjigjet për 4 muaj në gjykatën penale. I dënuar tashmë në vitin 2020 në Saintes, në Francën qendrore-perëndimore, me 15 vjet burg për përdhunimin dhe dhunën ndaj 4 fëmijëve, përfshirë dy mbesat e tij, ish-mjeku ndodhet në bankën e të akuzuarve për ngjarje që datojnë nga periudha midis 1989 dhe 2014 në disa spitale në perëndim të vendit, veçanërisht në Bretagna.
Hetuesit gjetën gjurmë të viktimave, pacientë të cilët ishin mesatarisht 11 vjeç kur vuajtën dhunën, duke shqyrtuar ditarët dhe agjendat e kirurgut, të gjetura në shtëpinë e tij gjatë një kontrolli në vitin 2017. Shkrimet e tij shumë të detajuara tregonin emrin, moshën dhe adresën e viktimave, si dhe llojin e dhunës së ushtruar, shpesh të mbuluar nga procedurat mjekësore. Le Scouarnec, në këto vite hetimesh, cilësohet si “pedofil prej dekadash”. Ai përballet me një dënim shtesë prej 20 vitesh burg.
Discussion about this post