Kryebashkiaku i Kavajës, Fisnik Qosja, blen me çmim shumë të shtrenjtë një kënd të varfër lojërash. Kjo ndodh sepse komisioni nuk konsultohet më tregun kur llogarit fondin limit, por vetëm ndjek porositë e kryetarit, që sigurisht ka bërë një pazar paraprak me përfituesin e fondit. Po flasim për prokurimin me objekt ‘Furnizim vendosje e pajisjeve rekreative për mirëmbajtjen e parqeve të qytetit’ me vlerë 38 milionë lekë.
Përshkrimi i tenderit është pak i ngatërruar, sa të shkon mendja se do të blihet ndonjë pajisje që do të përdoret për të mirëmbajtur parkun dhe bimët, rrugët dhe ndriçimin.
Në fakt, sipas të dhënave në dokumentet shoqëruese, do të blihet kënd lojërash për fëmijë, si dhe pajisje fitnesi.
Për këto rrëshqitëse, lëkundëse dhe dy biçikleta fitnesi mund të shpenzohen më pak para, nëse do ishte zbatuar procedura e rregullt tenderuese, por skenarët që ka thurur Qosja kanë fryrë edhe fondin limit.
Le të bëjmë një krahasim me porositë që ka kryer kohët e fundit kompania fituese e tenderit ‘Falgeo’ shpk.
Pra, sipas tabelës së mësipërme të tenderave të marrë më parë në njësitë e tjera vendore, të njëjtën porosi, kompania e ka kryer disa herë më lirë, me çmime që variojnë nga 4.5 milionë lekë deri në 29 milionë lekë, pa llogaritur TVSH.
Gjatë kohës që “gara” ka qenë e hapur janë dorëzuar vetëm 2 oferta. Propozimi i “Luljeta Zanajt” është shkualifikuar pasi, sipas komisionit, nuk ka dorëzuar mostrat e mallrave dhe ka mungesë dokumentacionesh. Kështu mbeti vetëm oferta e firmës “FALGEO. Sipas ligjit, procedurat nuk duhej të vazhdonin vetëm me një konkurrent.
Por rregullat nuk vlejnë më për kryebashkiakë si Fisnik Qosja, që i kanë kthyer tenderat në gropë për buxhetet e bashkive. Kështu kryetari Qosja ka vazhduar me planin e tij duke ia dhënë fitoren firmës “FALGEO” me pronar Florian Gjokën.
Open Data Albania e ka vlerësuar tenderin me “Flamurin e kuq”, që është shenja e riskut të korrupsionit. Nëse do të ishin ndjekur rregullat e prokurimit, me aq lekë bashkia do të blinte dy deri në trefishin e këtyre lodrave. Në këtë rast “taksa” e korrupsionit u vendos në kurriz të fëmijëve.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post