Një denoncim i një qytetari në Fier, me pretendimin se i kishin vënë gjobë pa të drejtë, ka çuar në prangosjen e dy inspektorëve të AKU-së në Fier. Qytetari kishte në pronësi një biznes fruta-perime, teksa është gjobitur me 400 mijë lekë pa dijeninë e tij. Sipas qytetarit, më 14 shtator inspektorët e AKU kanë vajtur pa mjet identifikimi dhe i kishin kërkuar lekë, por ai nuk kishte pranuar. Më pas më datë 15 shtator, pa dijeni e qytetarit, inspektorët i kishin vendosur gjobë prej 400 mijë lekësh, që është bërë dhe shkak që qytetari ta denoncojë rastin në njësinë Anti-Korrupsion.
Ky rast është denoncuar nga Ministri i Drejtësisë, Ulsi Manja, i cili kallëzoi në prokurori për korrupsion dy inspektorët e AKU-s Fier.
“Qytetari u është kundërpërgjigjur taxhimëve të AKU-së që e kanë gjobitur me vulën e institucionit shtetëror, duke lajmëruar Njësinë anti-korrupsion dhe menjëherë ne jemi vënë në dispozicion dhe sot gjobëvënësit me maskën e shtetit, por që nuk përfaqësojnë shtetin dhe shtetarin, nuk përfaqësojnë aspak qeverinë e Shqipërisë, nuk përfaqësojnë këtë shumicë qeverisëse dhe besimin e dhënë tre herë me radhë nga qytetarët, do t’u duhet të përballen me drejtësinë. Dhe nuk do ta kenë të lehtë”, u shpreh Ulsi Manja.
Nuk mbaron me kaq, tha ministri Ulsi Manja:
“Do të vendos në kallëzim edhe drejtuesin e tyre, si person në dijeni të paktën, sepse drejtuesit e këtyre agjencive dhe këtyre institucioneve nuk mund të bëjnë të paditurin për veprimet e këtyre inspektorëve. Uroj që prokuroria të vihet menjëherë në lëvizje për ti treguar atij qytetari se zëri i tij respektohet dhe është i pa diskutueshëm në prani të provave”, shtoi Manja.
Takimi i radhës, paralajmëroi ministri Drejtësisë, do të jenë për kallëzimet në hipotekë dhe për legalizimet.
Qytetarët që do të përballen me abuzime nga zyrtarë të administratës shtetërore tashmë mund t’i denoncojnë ata nëpërmjet fakteve në Njësinë Antikorrupsion. Kjo njësi ka nisur procesin publik të denoncimeve në SPAK, për t’i dhënë fund korrupsionit dhe abuzimeve në administratën publike.
Discussion about this post