Paratë e taksapaguesve shqiptarë duket se më shumë i përpinë Administrata Shtetërore, duke qenë se bën shpenzime pa kriter dhe shton punonjës që nuk nevojiten. Kështu ka evidentuar në një raport të publikuar së fundmi “Open Data Albania”, ku përcaktohet numri i punonjësve aktualë në Administratë, plani për fryrje gjatë 2022, si dhe pagat sipas çdo ministrie.
Nga të dhënat e publikuara, evidentohet se në vitin 2022 në Institucionet Drejtpërdrejt Buxhetore, është parashikuar numër punonjësish buxhetor 84. 214. Janë 450 më shumë të punësuar se në 2021. Të punësuar në institucione buxhetore përfshijnë vetëm institucionet, në të cilat kostot e punonjësve mbulohen me fondet e Buxhetit të Shtetit.
Në vitin 2022 rezultojnë 65 institucione buxhetore të cilat përfaqësojnë institucionet publike, si: Presidenca, Parlamenti, Qeveria, Sistemi i Drejtësisë dhe Gjykata Kushtetuese. Si pjesë e Qeverisë janë: Kryeministria, 11 ministri dhe institucione të tjera qeveritare. Pikërisht këto institucione po shpenzojnë më shumë nga taksat tona për të paguar numrin tejet normales të punonjësve me kohë të plotë dhe të pjesshme.
Qeveria ka vendosur të shtojë tre institucione të reja, me një numër të konsiderueshëm punonjësish, çka rrjedhimisht i bie më shumë shpenzime, pasi do të jepen më shumë paga. “Tre institucione të reja planifikojnë staf dhe kosto buxhetore në 2022. Konkretisht Agjencia Kombëtare e Rinisë me 20 persona staf; Agjencia Shtetërore e Programimit Strategjik dhe Koordinimit të Ndihmës e cila planifikohet të ketë 73 persona të punësuar dhe Agjencinë për Media dhe Informim me 69 punonjës buxhetor”, thuhet në raport.
Institucionet që abuzojnë
Në raport thuhet se numrin më të lartë të punonjësve e regjistrojnë ministritë, me në krye Ministrinë e Arsimit. Madje në vitet e fundit situata është bërë abuzive, pasi disa prej punonjësve pothuajse nuk kanë asnjë rol dhe nuk janë të nevojshëm. Sipas “Open Data”, kjo skemë rrjedhimisht përkthehet në para të çuara dëm për punë që nuk bëhet.
“Institucionet më të mëdha buxhetore janë ministritë, të cilat krahas aparatit ministror përfshijnë dhe numrin e të punësuarve në institucionet e varësisë. Ministria e Arsimit, Sportit dhe Rinisë ka numrin më të lartë të punësuarëve, përkatësisht 37% të të punësuarve në institucione buxhetore ose 30 990. Në vendin e dytë Ministria e Brendshme me 15 109 punonjës ose 18% të të punësuarve buxhetore. Ndër programet kryesorë të këtij institucioni është ofrimi i shërbimit policor.
Pasohet nga Ministria e Mbrojtjes me 8 863 të punësuar ose 11% e totalit. Ministria e Financave dhe Ekonomisë planifikon 5 983 të punësuar ose 7% të totalit. Ministria e Drejtësisë rezulton pothuaj në të njëjtat pozita si ajo e financave me mbi 5 mijë të punësuar ose 6% të totalit. Vijojnë me më pak se 5 mijë të punësuar, Ministria e Shëndetësisë me 4 313, Ministria e Bujqësisë me 2 417 të punësuar”, thuhet në raport.
Shpenzimet për pagat
Sipas raportit, nëse bëjmë një llogaritje të thjeshtë paga mesatare e një buxhetori, pagë e deklaruar rezulton 74. 931 lekë. Ndërsa po të llogarisim numrin e punonjësve që shtohen me vlerën e pagës minimale, i bie që të shpenzohen 3 371 895 lekë më shumë, të cilat sigurisht do të vilen nga taksapaguesit shqiptarë.
“Paga mesatare mujore në SPAK përllogaritet rreth 241. 000 Lekë, në institucione drejtësie si Komisioni i Pavarur i Kualifikimit; Kolegji i Posaçëm i Apelimit; Komisioneri Publik dhe Zyra e Inspektorit te Larte te Drejtësisë paga mesatare mujore shkon rreth 190. 000 lekë, Pasohen nga Gjykata Kushtetuese dhe Prokuroria e Përgjithshme mesatarisht rreth 150 000 lekë në muaj pagë. Pas strukturave të drejtësisë renditet KLSH, Kuvendi, Kryeministria, Komisioni i Prokurimeve Publike, Presidenca, Këshilli i Kontabilitetit me paga mesatare institucionale mujore mbi 100 mijë lekë. Ndërsa institucionet më paga mesatarisht më të ulëta janë në Ministritë e Drejtësisë, Shëndetësisë, Kulturës, Bujqësisë dhe e fundit Ministria e Mbrojtjes me më pak se 64. 000 lekë në muaj pagë mesatare”, shprehet “Open Data”. Ndërsa theksojmë se, fondi i pagave të cilin po marrim si referencë përfshinë pagën e deklaruar duke përfshirë edhe vjetërsi në punë apo pagesa sipas kontributeve specifike.
Discussion about this post