Koalicioni “Nisma Shqipëria Bëhet” ka bërë ndryshime në listën e kandidatëve për deputet, që shkaktoi më herët polemika.
Babai i Adriatik Lapajt, Ferman Lapaj, i cili u tha se kryesonte listën e këtij koalicioni në Berat, nuk figuron në versionin e finalizuar në KQZ.
Lista kryesohet nga Aleksandër Bacaj.
Lajmi se Ferman Lapaj, ishte kryesues i listës së koalicionit në Berat bëri menjëherë xhiron e mediave.
Në një reagim në rrjetet sociale para dy ditësh, Lapaj u përgjigj duke thënë se po përdorej kundër tij një listë paraprake dhe se kandidimi i njerëzve të besuar në listat e mbyllura është forma se si “Shqipëria Bëhet” po refuzon listën e mbyllur.
Sipas Lapajt, kandidatët realë janë në listat e hapura, dhe në rast fitoreje të mandatit, ato njerëz të besuar në listë të sigurt do të tërheqin emrin për të lejuar kandidatin me më shumë vota nga lista e hapur të marrë mandatin.
Por kjo paqartësi nga koalicioni Lapaj-Shabani ka shkaktuar kritika në rrjetet sociale.
Përveç rastit të babait, lajm bëri edhe marrëveshja e lënë përgjysmë e minutave të fundit me Dash Sulën, deputetin e zhgënjyer të Partisë Demokratike.
Discussion about this post