Kreu i Partisë Demokratike, Sali Berisha, ka lëshuar akuza të forta ndaj qeverisë Rama, duke e cilësuar kontratën për ndërtimin e Aeroportit të Vlorës si një “skemë korruptive” që rëndon mbi taksapaguesit shqiptarë.
Në një deklaratë publike, Berisha ka denoncuar shpenzimet e fryra, përfitimet e koncesionarit dhe cilësinë e dyshimtë të punimeve.
Sipas Berishës, kontrata e firmosur nga kryeministri Edi Rama dhe ministrja Belinda Balluku parashikon që qeveria të kompensojë koncesionarin për çdo vit ku numri i pasagjerëve bie nën parashikimin.
Kjo përkthehet në një pagesë prej mbi 9 milionë euro në vit, duke arritur në total 135 milionë euro, një shumë që, sipas tij, tejkalon me 20 milionë euro koston reale të ndërtimit të aeroportit.
Berisha deklaroi se koncesionari pritet të përfitojë deri në 700 milionë euro nga kjo marrëveshje, ndërsa qytetarët paguajnë për një projekt që nuk garanton transparencë apo standarde teknike. “De facto, këto para ndahen mes Lubisë dhe koncesionarit,” tha ai.
Ju jeni dëshmitarë se unë prej tre vitesh denoncoj publikisht aeroportin e Vlorës për dy arsye madhore.
Arsyeja e parë madhore që unë kam denoncuar aeroportin e Vlorës është korrupsioni mbi të cilin ngrihet kjo vepër e infrastrukturës dhe që u kushton qytetarëve shqiptarë çmim të tmerrshëm.
Unë kam denoncuar para jush se kontrata e Edi Ramës dhe Lubi Ballukut me ndërtuesin e aeroportit, parashikon që qeveria shqiptare të paguajë për 10 vite me radhë të gjithë biletat nën numrin e parashikuar.
Sipas kësaj kontrate ultrakorruptive, qeveria do i paguajë çdo vit mbi 9 milionë euro koncesionarit, dhe mundet edhe më shumë.
Qeveria pra, shqiptarët do paguajnë në 10 vite 135 milionë euro. Do paguajnë edhe 20 milionë euro më shumë seç ka kushtuar aeroporti vetë dhe koncesionari do shfrytëzojë aeroportin për 35 vite me një fitim të llogaritur 700 milionë euro.
A ka njeri në botë që mund të firmosë një kontratë të tillë?
Koncesionari ndërton koncesionin, ndërton veprën. Natyrisht në ato 700 milionë euro është stër-stërfitimi i tij.
700 milionë euro janë 5-6 herë kostoja e ndërtimit.
Dhe, kjo jo, në vend së të paguajë taksapaguesve fee-në koncesionarë, taksapaguesit shqiptarë i paguajnë koncesionarit rreth 10 milionë euro.
De facto këto ndahen midis Lubisë dhe koncesionarit, se ndryshe nuk mund të ketë kurrë, nuk mund të ndodhë një gjë e tillë.
Pra, në vend se t’i paguajë shtetin fee-në koncesionare nga viti i parë, qyetarët i paguajnë Lubisë, Ramës dhe koncesionarit 130 milionë euro, pra nja 20 milionë euro më shumë se të gjitha shpenzimet për ndërtimin e aeroportit të Vlorës.
Tani që aeroporti po i afrohet fundit janë prishur pazaret se si do ndahen paratë dhe ka shpërthyer një grindje e brendshme.
Inxhinieri supervizues i pistës ia ka mbathur edhe është arratisur në Britani. Burime serioze më kanë thënë se asfalti dhe pista janë jashtë të gjitha standardeve”, tha ai.
Në fund kreu i PD-së nënvizoi se atje nuk ekziston asnjë parametër dhe për më tepër dëmtohet një nga pasuritë kombëtare, Laguna e Nartës.
“Aspekti më dramatik i këtij aeroporti është shkatërrimi i lagunës së Nartës.
Shkatërrimi i lagunës së Nartës është akt krimi më i rëndë mjedisor në Shqipëri, në Ballkan dhe nuk mund të krahasohet as me krimet monstruoze që janë kryer në Bashkimin Sovjetik duke zbrazur liqeje dhe mbyllu liqeje.
Nuk prishet habitati shekullor i vendosur. Përbën një krim të shëmtuar.
Unë u them ju, kur ndërtuam rrugën Levan-Vlorë me hua të marrë nga Banka Europiane, u detyruam ta ndryshojmë projektin me një kosto shtesë jo të vogël, vetëm për t’iu larguar zonës së habitatit.
Dhe ky shkoi e ndërtoi aeroportin aty.
I ka dhënë edhe nja 100 hektarë aty përreth se do të ndërtojë vetë aty tani me klanet e tij mafioze”, shtoi Berisha.
Discussion about this post