Portieri shqiptar i skuadrës së Lazios, Thomas Strakosha gabimisht e futi topin në rrjetën e tij në ndeshjen Stambollit, duke i dhuruar Galatasarayt fitoren 1-0 dhe tri pikët e para në ndeshjet e grupit “E” në Europa League.
Ky gabim e preku shumë gardianin kuqezi, i cili më pas do ta linte fushën i shkatërruar psikologjikisht.
Ndërsa pas përfundimit të këtij takimi, në mbrojtje të tij ka dalë homologu i skuadrës turke, Fernando Muslera.
“Të kthejmë kokën pak mbrapa, disa ndeshje më parë edhe unë kam bërë një gabim të tillë. Gjëra të tilla mund të ndodhin gjithmonë. Unë kam diçka për të thënë, portierët janë vetëm në fushë. Do të ketë gabime si ai i Strakoshës sot. Kjo është çudia e punës së portierit. Gabimi ynë nuk falet. Kjo është gjithashtu pjesë e punës sonë, por ne duhet të vazhdojmë pa u demoralizuar, nuk duhet të heqësh dorë”,- u shpreh Fernando Muslera, kapiteni i Galatasarayt.
Momenti i asaj gafe është bërë shumë viral, me kritikat dhe talljet e shumta drejtuar shqiptarit./K.T/Gijotina.com
