Kreu i Partisë Demokratike, Lulzim Basha në konferencën e tij të fundit për këtë vit, ka folur dhe për afatin që paraardhësi i tij, Sali Berisha, i ka lënë për të liruar zyrën e kreut të selisë blu, duke pretenduar se ai tanimë është i shkarkuar. Basha është shprehur se nuk do të ndodh asgjë në këtë datë, ndërsa shtoi se PD është e përgatitur për çdo skenar.
“Asgjë nuk do të ndodhë, asgjë, PD është e përgatitur për cdo situatë dhe nuk do të lejojmë trekëndëshin e Bermudës ta zhvendos fushën e betejës në PD”, tha Basha.
Basha u shpreh se ëndrra e kryeministrit Edi Rama për të pasur përballë një PD të damkosur me “non-grata”-n është goditur me 9 shtator, ndërsa me 18 dhjetor, ku u mbajt dhe Kuvendi Kombëtar i PD-së, thirrur nga Basha, kjo ëndërr u bë pluhur e hi.
“Nuk mund të them se kam arritur ta dëgjoj atë që ka thënë Edi Rama sot, kështu që nuk kam koment për këtë në vetvete, por dua të them se ëndrra e Edi Ramës për të pasur përballë një PD të damkosur, mori goditjen e parë me 9 shtator dhe u bë pluhur e hi më 18 dhjetor kur demokratët zgjodhën të ardhmen. Ka arsye të jetë nervoz, demokratët kanë zgjedhur të bashkohen dhe me shqiptarët. Do t’i japin fund qeverisjes më të korruptuar në rajon. Zgjodhën t’i japin fund pandëshkueshmërisë dhe kastës 30-vjeçare” tha Basha.
Kryedemokrati shtoi gjithashtu se tentativa e asaj që ai i referohet si trekëndësh i Bermudës, për të përçarë PD-në, është e kotë.
“Në rolin kryesor të trekëndëshit të Bermudës, Edi Rama është lodhur dhe do vazhdojë të lodhet, por e ka kot, sepse lojërat për të përçarë PD-në, ta delegjitimojë, apo ortaku i tij i fundit, tubi i oksigjenit, betejën tonë, nismat tona, të gjitha do të dështojnë. PD e bashkuar dhe pastruar nga hijet e së shkuarës është sot alternativa, është shpresa e gjithë shqiptarëve për ndryshim dhe është përgjegjësia ime dhe ekipit tim që këtë shpresë ta jetësojmë sa më parë” tha ai.
Discussion about this post