Menjëherë sapo ka përfunduar Konferenca e Kryetarëve, kryetari i grupit parlamentar të PS, Taulant Balla, deklaroi se ekspertët e drejtësisë po punojnë për zgjatjen e afatit të KPK.
Ai tha që të bëhet shtyrja e afatit në procesin e vettingut nevojitet një amendament dhe ai do bëhet publik shumë shpejt. Ndërsa, theksoi se nuk ka pasur pazare me PD për këtë çështje.
“Dua t’iu sqaroj se ekspertët tanë janë duke punuar intensivisht për çështjen e vettingut. Dy institucionet që kanë këshilluar mbarëvajtjen e reformës në drejtësi, për zgjatjen e komisionit të përkohshëm të kualifikimit. Do arrijmë që të kemi brenda një kohe të shkurtë një amendament, që më pas të nisë procedura parlamentare.
Ju e dini mirë se një amendament kërkon një kohë 45 ditë, si i tillë kjo kërkon shumë punë. Unë e konsideroj çështje teknike me të cilën politika duhet të rrijë larg. Askush mos ta politizojë, ta mbajë teknik. Dua t’ju garantoj se nuk ka asnjë lloj pazari, se është një çështje që e konsideroj si të rëndësisë së veçantë, për çështje të tjera ne do të shprehim gatishmërinë tonë, për çdo lloj çështje që mund të vijë nga opozita”, tha ai, duke hedhur poshtë deklaratën e Nokës se PS ka i ofruar një pakt PD për këtë çështje.
