Kreu i PD, Lulzim Basha, duke folur nga Dibra ditën e sotme ka risjellë në vëmendje skandalin me inceneratorët. Duke vënë edhe njëherë në dukje se opozita do vazhdojë të nxjerrë çdo ditë fakte dhe prova për korrupsionin që ka kryer qeveria me këto projekte, Basha i kërkoi Ramës të japë dorëheqjen. Sipas tij, në çdo rrethanë tjetër, çdo kryeministër sado pak normal do të ishte dorëhequr.
“Burgoset një nga ministrat që mbiemrin e ka Koka, por në fakt është bishti i kësaj afere. Në çdo rrethanë tjetër, çdo kryeministër sado pak normal do të ishte dorëhequr. Do ishte vënë në dispozicion të drejtësisë. Në fakt ai ka bërë të kundërtën, ka marrë grupin e tij parlamentar dhe e ka çuar tek skena e krimit. E ka çuar tek inceneratorët për t’u bërë mburojë e një afere që i ka kushtuar dhe iu kushton shqiptarëve 430 milionë euro. Para të cilat vidhen, ndërkohë që qytetet tona mbulohen nga smogu, mbushen me plehra, sepse e gjitha nuk është veçse një skemë mashtrimi, vjedhje dhe shfrytëzimi. Skandali i inceneratorëve, varfëria që ka pllakosur anembanë vendit, ekonomia në kolaps dhe së fundmi rënia e çdo institucioni”, tha ai.
Në këtë kuadër ai i kërkoi qytetarëve për t’i ngritur sa më parë pri shkarkimit të Ramës, duke theksuar se ka ardhur koha që qytetarët të mos iu preket më dinjiteti. “Janë shkaqe të mjaftueshme për t’i kërkuar çdo shqiptari pavarësisht bindjeve politike që të bashkohemi, të ngrihemi në këmbë dhe të kërkojmë atë që do të kërkonte çdo popull me një fije dinjitet: Largimin një orë e më parë të kësaj qeverie. Largimin një orë e më parë dhe vënien e saj para drejtësisë”, tha ai.
Discussion about this post