Belind Këlliçi, ish-deputet dhe anëtar i Kryesisë së PD-së, paralajmëroi publikimin e dokumenteve të tjera lidhur me aferën e inceneratorëve.
Nga studio e emisionit “Task Force”, Këlliçi tha se dokumentet që do të publikohen do të tregojnë se ku kanë shkuar paratë e inceneratorit të Tiranës, gjë që SPAK prej disa muajsh hetimesh nuk po arrin të gjejë destinacionin, të paktën zyrtarisht.
“Tashmë që ne kemi prej 6 muajsh pa pushim dhe faktojmë çdo ditë që pronari faktik është Erion Veliaj, e konfirmuar edhe nga goja e ish-numri Arben Ahmetaj, kjo çështje është ezauruar.
Erion Veliaj është pronari faktik, me bekimin e Edi Ramës.
Tani çështja kryesore është se ku janë paratë. Ne do të gjurmojmë paratë.
Deri tani kemi depozituar qindra faqe dokumente që faktojnë se ku kanë shkuar, transferuar paratë.
Në ditët në vijim do të publikojmë detaje të tjera në lidhje me biznesin e dherave.
Kemi goxha dokumente, SPAK të vazhdojë të bëjë punën e tyre, ne tonën. Na shtohen dhe rrugës dokumente të tjera”, tha Këlliçi.
Në vijim ai shtoi se për ti shpëtuar burgut, të implikuarit shesin të gjithë njëri-tjetrin.
“Materialet, dokumentet që marrim, pasi lexohen dhe administrohen, e verifikohen nga një grup ekspertësh që merren me këtë çështje, ne i bëjmë publike.
A ka prona të blera nëpër kullat e Tiranës nga pronarët dhe prestanomet e inceneratorit të Tiranës?
A ka kontrata të cilat janë lidhur me klering nga ITS e famshme, e cila merrte para po nga vetja e saj. Klodian Zoto merrte para nga Mirel Mërtiri për të blerë prona.
A ka prona të tjera, apo llogari ofshore në ishujt Kajman, Seychell, apo në vende të tjera?
Paratë janë të rëndësishme.
SPAK le të rrijë përgjumur, ne do të bëjmë punën tonë’, u shpreh Belind Këlliçi.
Discussion about this post