Mirel Mërtiri, i shpallur në kërkim ndërkombëtar nga SPAK, lidhur me atë që njihet si afera e inceneratorëve, ka akuzuar SPAK se ka manipuluar dosjen. Mërtiri tha se dosja është e stisur nga prokurori i SPAK, KLodian Braho.
“Nëse ju dëshironi që unë të flas në emër të zotit Koka, unë nuk e di pse zoti Koka apo Ministria pranoi këtë ofertë nga ana jonë.
Unë di të them që zoti Koka dhe të gjithë ata që janë akuzuar për dosjen e Elbasanit, ndodhen në mënyrë të padrejtë në burg.
Të gjithë faturat që SPAK ka paraqitur në dosjen hetimore janë fatura dhe akte të hetuara që prej vitit 2017, pra nuk ishte hera e parë që këto fatura hetoheshin.
E dyta si mundet të thuhet se këtu është vjedhur, është abuzuar, kur vetë vlerësuesi i emëruar nga SPAK, thotë se vlera e investimit për impiantin e përpunimit të mbetjeve në Elbasan, është më e madhe se vlera e kontratës.
E gjithë kjo dosje është dosje e stisur. E gjitha është një dosje e stisur nga prokurori i SPAK.
Prokurori quhet Klodian Braho”, tha Mërtiri në Syri Tv.
Në vijim të akuzave ndaj SPAK, Mërtiri theksoi se mendonte se SPAK e ka bërë për arsye që i ka shërbyer dikujt në politikë ose dikujt në privat.
“Që në momentin e parë kur kjo dosje është prezantuar në gjykatë, avokatët e mi kanë njoftuar se dosja është e ndotur, që do të thotë se është një dosje e bërë nga fillimi deri në fund në mënyrë fiktive dhe jokorrekte.
Provat janë vendosur ashtu siç ka dashur prokurori i SPAK, me qëllim për të më goditur mua dhe familjen time, për arsye të dikujt tjetër që ndoshta nuk ishte në dosje”, tha Mërtiri.
Ai tha se duke e ditur se dosja ishte e kontaminuar, pra që provat janë të gjitha të manipuluara, i jam drejtuar SPAK-ut, më saktë në fillim Ministrisë së Drejtësisë dhe më pas kryetarit të SPAK, Altin Dumani që të më jepet mundësia të jap deklarimet e mia për dosjen e inceneratorëve.
“I jam drejtuar për të gjitha dosjet apo veprimet hetimore që po kryhen për impiantet e mbetjeve,’ tha Mërtiri.
I pyetur nëse kanë kaluar 3.7 milionë euro në llogaritë e kompanisë së Lefter Kokës nga inceneratori i Elbasanit, Mërtiri e mohoi duke thënë se dokumentet janë falsifikuar nga SPAK.
‘Unë ua thashë që ato lekë nuk kanë kaluar te kompanitë e Lefter Kokës. SPAK i ka falsifikuar dokumentet dhe vlerat në të cilat këto kontrata janë zhvilluar,’ tha Mërtiri.
Discussion about this post