Mbijetesa e afganëve tanimë po garantohet nga vajzat e tyre të cilat po shiten për disa qindra dollarë.
Martesat që në fëmijëri praktikohen prej shekujsh në Afganistan, por lufta e fundit dhe thatësira e madhe prej klimës, po bëjnë që vajzat e vogla të jepen me para që në moshë fare të mitur.
I tillë është edhe rasti i Gul Bibi, nëna e një vajze tetëvjeçare, e cila tregon se shiti të bijën për martesë tek një 23-vjeçar për t’i larë borxhin familjes.
“Kjo është vajza ime. E shita për 3 mijë dollarë prej urisë dhe borxhit. Pas disa ditësh do të vijë burri që e bleu për ta marrë në shtëpinë e vet. E di që nuk është veprimi i duhur, as për Zotin, as të dërguarin e tij, por nuk ka zgjidhje.”
Historia përsëritet në një tjetër kamp të shpërngulurish nga lufta dhe varfëria. Mohamedi dhe Kajlani prindër të dy vajzave i kanë shitur secilën.
Ata jetojnë familjarisht në kampin e përkohshëm në një provincë të varfër.
Kriza ushqimore po godet si qytetet edhe zonat rurale dhe po i detyron banorët të këmbejnë sendet personale me bukë.
Kombet e Bashkuara vlerësojnë se 23 milionë afganë këtë dimër rrezikojnë zinë e bukës dhe për t’i ushqyer pjesërisht do të kenë për muaj nevojë për mbi 200 milionë dollarë ndihma.
