Në luginën e Panjshirit në Afganistan janë raportuar luftime të reja ndërmjet talebanëve dhe grupeve të armatosura që kundërshtojnë sundimin e tyre. Lugina Panjshir, në veri të kryeqytetit Kabul, është një nga provincat më të vogla të Afganistanit dhe e vetmja që nuk ka rënë në duart e talebanëve. Aty jetojnë diku midis 150.000 dhe 200.000 njerëz.
Rezistenca ndaj talebanëve udhëhiqet nga udhëheqësi fisnor lokal, Ahmad Masoud. Babai i tij kishte luftuar kundër pushtimit sovjetik më 1980 dhe atij taleban në vitet 1990. Talebanët u përballën me rezistencë nga grupet opozitare dhe ish-pjesëtarë të ushtrisë afgane në Luginën Panjshir.
Përmes një video mesazhi dërguar në BBC, zëvëndëspresidenti i Afganistanit, Amrullah Saleh tha se janë regjistruar viktima nga të dyja palët. Saleh po bën përpjekje t’i prijë rezistencës ndaj talibanëve.
“Jemi në një situatë të vështirë pasi jemi nën pushtimin e talibanëve”, tha ai, duke shtuar se forcat e tij nuk do të dorëzoheshin.
Në fund të muajit gusht, forcat amerikane u tërhoqën nga Afganistani, pas 20 vjetësh prani në këtë vend.
