Policia e Shtetit ka zbarkuar këtë të mërkurë në kompleksin “Equos Resort”, ku po ekzekutohet vendimi për sekuestrimin e pasurive të dyshuara të lidhura me Ergys Agasin. Sipas hetimeve, në qendër të veprimit janë disa vila brenda resortit, të cilat dyshohet se janë ndërtuar pa leje dhe më pas janë legalizuar në mënyrë të kundërligjshme, si pjesë e një skeme më të gjerë pasurish të dyshimta.
Në kuadër të hetimit të SPAK për dosjen e AKSHI-t, janë sekuestruar pasuri që kapin vlera disa milionë euro, të lidhura me Ergys Agasin, ish-drejtoreshën e AKSHI-t Mirlinda Karçanaj dhe Ermal Beqirin. Vendimi i Gjykatës së Posaçme përfshin sekuestrimin e 39–40 pasurive në total, të shpërndara në Tiranë, Durrës, Vlorë dhe zona të tjera të vendit. Në këto pasuri përfshihen mbi 10 apartamente dhe garazhe në Tiranë, disa apartamente në Durrës, disa toka dhe truall me sipërfaqe qindra deri mijëra metra katrorë, si dhe ndërtesa banimi shumëkatëshe në zona si Petrela dhe Lundra.
Në detaje, vetëm në zonën e Petrelës janë sekuestruar disa parcela pylli me sipërfaqe që variojnë nga rreth 900 m² deri mbi 26,000 m², ku ndodhen edhe ndërtime nga 1 deri në 2 kate me sipërfaqe nga rreth 180 m² deri mbi 500 m². Në Lundër është bllokuar një truall rreth 406 m² me ndërtesë, ndërsa në Durrës një truall rreth 400 m² dhe një ndërtesë rreth 165 m².
Në Vlorë, në zonën e Gjilekut, është sekuestruar edhe një tjetër truall me ndërtesë. Po ashtu janë bllokuar llogari bankare në OTP, Credins dhe BKT, një automjet luksoz Land Rover Defender 2023, aksione në një subjekt tregtar, si dhe një numër i madh garazhesh dhe apartamentesh shtesë. Hetimet vijojnë për të përcaktuar vlerën e saktë totale të pasurive dhe origjinën e tyre financiare.
Discussion about this post