Mbyllja e çdo sporteli të kadastrës shtetërore prej 3 Korrikut dhe ofrimi i shërbimit vetëm online nëpërmjet e-Albania po shkakton probleme për përfundimin e transaksioneve të shit-blerjes së pronave.
Shkak i mosofrimit të shërbimeve në sportel është nisja e zbatimit të reformës për dixhitalizimin e kadastrës. Nisja e reformës u njoftua në fund të muajit qershor nga Kryeministri Edi Rama, duke e cilësuar të domosdoshme mbylljen e aksesit të publikut në sportelet fizike, pasi siç pohoi ai e ka kthyer institucionin në vatër korrupsioni dhe qokash.
Tashmë 2 javë nga mbyllje e shërbimeve fizike në kadastër agjentët imobiliarë të shitjeve të pronave ngrenë shqetësimin e bllokimit të veprimtarisë së tyre në përfundimin e transaksioneve të shitjes dhe blerjes.
Më tepër shqetësuese situata paraqitet në Sarandë ku aktualisht përkon me shtim të kërkesës për blerje të apartamenteve veçanërisht nga shtetasit e huaj.
Drejtuesi i agjencisë imobiliare “Saranda Property” Eron Çumani pohoi për Monitor se mosfunksionimi i shërbimeve në kadastër për shkak të dixhitalizimit ka bllokuar shitjen e pronave në Sarandë. “Prej datës 3 korrik shitja e pronave në Sarandë është e bllokuar dhe kjo për shkak të mosofrimit të shërbimit nga kadastra. Aktualisht ka kërkesë nga të huajt, por për shkak të kësaj problematike, nuk po përfundojmë asnjë shitje”.
Shqetësuese situata paraqitet edhe në Tiranë dhe jo për shkak të mbylljes së sporteleve, por mosfunksionimit të shërbimit online. Dritan Leka nga agjencia imobiliare “Century 21 CPM Smart” tha se reforma e dixhitalizimit ka sjellë që një aplikim për shitje pronë në Tiranë të shfaqet në sistemin e kadastrës së një qyteti tjetër, të cilët nuk janë në gjendje të përpunojnë të dhënat për Tiranën, duke krijuar shumë shqetësime.
I pyetur për situatën e krijuar Agjencia Kombëtare të Shoqërisë së Informacionit (AKSHI) tha për Monitor se nuk kemi të bëjmë me bllokim të procesit, por vetëm me vonesa. Sipas AKSHI-t vonesat vijnë pasi nuk janë të gjitha të dhënat të dixhitalizuara, proces që do të përfundojë me reformën. AKSHI tha se vonesat do të fillojnë të eliminohen në ditët në vijim.
“Ka fluks, dhe po trajtohen aplikimet sipas radhës, por nuk është bllokuar si proces. Pas 3 korrikut ka një skenar në sistem, siç u bë me dije edhe nga kryeministri Edi Rama dhe nga Drejtoresha e Agjencisë Kombëtare të Shoqërisë së Informacionit, Linda Karçanaj. Kryeministri Rama e bëri të qartë në daljen në konference se do të veprohet në bazë të algoritmit të sistemit dhe të rasteve që do të vijnë për t’u trajtuar nga rrethe të ndryshme të vendit.
Të jeni të sigurt që për çdo vonesë të qëllimshme, mban përgjegjësi personi përkatës.
Nuk janë të gjitha të dhënat të dixhitalizuara, ndaj dhe shërbimet janë me kohë procesimi. Ndryshe do dilnin dokumentet hipotekore si certifikata familjare. Ky fakt dihet”, thekson AKSHI në reagimin e tij.
Me zbatimin e reformës për dixhitalizimin shërbimet do të merren përmes platformës e-Albania. Janë 71 shërbime të kadastrës që do të merren online përmes platformës e -Albania duke nisur kështu dhe reformën e Kadastrës./D.Azo
Discussion about this post