Agjencia e Prokurimit Publik përjashton për dy vjet nga tenderat kompaninë e Agron Makollit, përfituese e madhe e tenderave të administratës për printera dhe bojëra. Vendimi është marrë më 20 dhjetor 2025 pasi APP është vënë në lëvizje nga shkresa e dërguar nga Prokuroria Pranë Gjykatës së Shkallës së Parë të Juridiksionit të Përgjithshëm Tiranë. Më 10 nëntor 2025, Prokuroria e Tiranës ka përcjellë pranë APP, Urdhrin datë 06.11.2025 të Prokurorit, për ekzekutimin e Vendimit penal Nr. 3209, datë 04 dhjetor 2018, të Gjykatës së Tiranës, për të dënuarën shoqërinë “Rikon-Al” shpk me NIPT L22119010H.
Nëpërmjet këtij urdhëri, Prokurori ka urdhëruar APP për ekzekutimin e dënimit plotësues, ndalimin e shoqërisë “Rikon-Al” Shpk për të marrë pjesë në procedurat e prokurimit të fondeve publike për një periudhë 2 vjeçare.
Dënimi i Agron Makollit në vitin 2018
“Më mirë vonë, se sa kurrë” ose “Drejtësi e vonuar, drejtësi e munguar”, kështu mund të quhet akti i Prokurorisë i një vendimi të marrë në vitin 2018 dhe të zbardhur para dy javëve. Më konkretisht bëhet fjalë për Vendimin Penal Nr. 3209 Prot., datë 4 dhjetor 2018, të Gjykatës së Shkallës së Parë të Juridiksionit të Përgjithshëm Tiranë, në të cilin është vendosur: 1. Deklarimi fajtor i të pandehurit pronarit të RIKON-AL SHPK, për veprën penale të “Falsifikimit të dokumenteve” dhe dënimin e tij me gjobë. Ndalimin i shoqërisë RIKON-AL SHPK, pajisur me NUIS (NIPT) L22119010H, për të marrë pjesë në procedurat e prokurimit të fondeve publike për një periudhë 2 vjeçare.
Po të ishte për APP, kompanive nuk u hyn asnjë gjemb për mashtrimet dhe falsifkimet, por janë organet e tjera dhe subjektet e interesuara që e detyrojën të vihet ndonjë rast në lëvizje.
Florjan Xhemalaj mashtron në 3 tendera
Në të njëjtën mbledhje, APP ka marrë edhe një vendim tjetër përjashtimi, që lidhet me kompaninë “Filara” shpk. Agjencia e Prokurimit Publik ka zhvilluar procedimin administrativ për përjashtimin e operatorit ekonomik “Filara” shpk, nga e drejta për të fituar kontrata publike, për “keqinformim për qëllime kualifikimi në procedurat e prokurimit”. Bëhet fjalë për 3 tendera:
- “Botime dhe revista për vitin 2024”, zhvilluar nga autoriteti kontraktor Akademia e Shkencave.
- “Ribotim i teksteve shkollore të arsimit bazë për nxënësit e pakicave kombëtare”, organizuar nga Ministria e Arsimit.
- “Blerje materiale arkive për nevojat e OSHEE Group sh.a.”, zhvilluar nga autoriteti kontraktor Operatori i Shpërndarjes së Energjisë Elektrike Group sh.a.
Operatori ekonomik “Filara” shpk, është pronë e Florjan Xhemalajt. Arsyeja e fillimit të procedimit administrativ ka qenë denoncimi i bërë më 20 qershor 2025 nga operatorit ekonomik “Kristalina-KH” shpk me pronar Kadri Hykajn.
Në përfundim të procedimit administrativ të nisur, u arrit në konkluzionin se kishte prova “për të përjashtuar operatorin ekonomik nga e drejta për të fituar kontrata publike për një periudhë nga 3 muaj deri në 3 vet për keqinformim dhe dorëzim të dokumenteve, që përmbajnë të dhëna të rreme për qëllime kualifikimi”.
Kështu, APP ka vendosur të përjashtojë operatorin ekonomik “Filara” shpk, nga e drejta për të fituar kontrata publike, për 5 muaj nga hyrja në fuqi e këtij vendimi.
Pra, për 3 tendera jepen pesë muaj përjashtim. Ky është një ndëshkim i butë që kompanitë e pranojnë pa asnjë lloj shqetësimi. Menjëherë mund të kundërshtohet vendimi në Gjykatën Administrative dhe kërkohet sigurimi i padisë, pra pezullim derisa të mbarojë gjyqi. Dihet se duhen vite të mbyllen cështjet nëpër shkallët e gjyqësorit shqiptar.
Vetëm 35 procedime nga APP për 1 vit
Sipas të dhënave të vetë APP, gjatë vitit 2024, janë marrë në shqyrtim 64 kërkesa, nga të cilat 63 për përjashtimin e operatorëve ekonomikë e drejta për të fituar kontrata publike dhe 1 kërkesë për përjashtim të operatorit ekonomik nga ankandet publike. Ndërkohë që, nuk ka patur kërkesa për përjashtim të operatorëve ekonomikë nga pjesëmarrja në koncensione/partneritet publik privat.
Nga informacionet e administruara rezulton se: 26 raste referohen për keqinformim dhe paraqitje të dokumentave me të dhëna të rreme sipas parashikimeve të nenit 78/1/a të LPP; 37 raste referohen për mospërmbushje të detyrimeve kontraktuale, sipas parashikimeve të nenit 78/1/b të LPP; – 1 rast i referohet keqinformim dhe paraqitje të dokumentave me të dhëna të rreme sipas parashikimeve të nenit 7/1/a i LAP.
Nga 64 kërkesat, ka nisur procedimi administrativ për 35 operatorë ekonomikë; 29 kërkesa, kanë rezultuar si të paplota në argumenta ligjorë dhe prova dokumentare, ose
pas verifikimeve të kryera ka rezultuar se, nuk kanë qenë kushtet e parashikuara nga dispozitat ligjore për nisjen e procedimit administrativ nga APP, ose janë në proces
shqyrtimi.
Gjatë procedimit administrativ të nisur për përjashtimin e operatorëve ekonomikë, në mbështetje të Kodit të Procedurave Administrative është vendosur pezullimi i procedimit për 7 operatorë ekonomikë, për shkak të procesit gjyqësor .
Sic shihet nga të dhënat, aktiviteti i APP është krejt i papërfillshëm në raport me shkeljet që kryhen gjatë prokurorimeve, kur gjatë vitit janë kryer mijëra procedura tenderimi.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post