Ka agravuar situata mes efektivëve dhe fermerëve, ku këta të fundit kanë arritur që të thyejnë kordonin e policisë dhe janë ulur në rrugë duke bllokuar qarkullimin në aksin nacional mes Lushnjes dhe Tiranës.
Mësohet se, fermerët janë përleshur me uniformat blu dhe FNSH-në dhe më pas janë ulur duke bllokuar qarkullimin, ku si pasojë e situatës së tensionuar, policia ka shoqëruar në komisariat disa persona.
Fermerët e Myzeqesë kanë dalë në protestë duke kundërshtuar paketën e re fiskale të projektbuxhetit 2022, për vendosjen e 10% të TVSH-së për imputet bujqësore ndërkohe që çmimi i tyre është rritur nga kriza energjetike globale.
“Ne i kërkojmë Edi Ramës të kthejë kokën tek bujqësia. Ne jemi lënë në rrugë dhe kemi besim tek Rama që t’i vendosë gishtin kokës pasi shumë njerëz punojnë tokën në këtë zonë, por asnjë nuk ka marrë subvencion”, tha një agronom.
Edhe pse prodhuesit dhe eksportuesit e fruta perimeve janë ulur disa herë në tavolinë me përfaqësues të ministrisë së Bujqësisë dhe të ministrisë së Ekonomisë, për të mos miratuar heqjen e TVSH-së të rimbursueshme nga 6% në 0%, deri më tani nuk është gjetur një gjuhë e përbashkët.
Discussion about this post