Ambasadorja amerikane në Shqipëri, Yuri Kim ka zhvilluar një bisedë me kryeministrin Edi Rama dhe me ministren e Jashtme, Olta Xhaçka lidhur me luftën mes Rusisë dhe Ukrainës. Me anë të një postimi në rrjetet sociale, njoftohet se Kim ka kërkuar mbështetjen e Shqipërisë për t’u koordinuar me Shtetet e Bashkuara të Amerikës kundër Rusisë.
“Ambasadorja Yuri Kim bisedoi sot me kryeministrin Edi Rama dhe ministrin e Jashtme, Olta Xhaçka për pushtimin e paprovokuar dhe të pajustifikueshëm të Ukrainës nga Rusia. Shtetet e Bashkuara dhe Shqipëria do të vazhdojnë të koordinohen ngushtë në NATO, Këshillin e Sigurimit të OKB-së dhe kudo për të vënë Rusinë përpara përgjegjësisë për agresionin e saj flagrant kundër Ukrainës dhe paqes e sigurisë globale,”-shkruhet në njoftimin zyrtar.
Mëngjesin e sotëm, Ukraina u zgjua nga sulmet e Rusisë teksa lufta nisi zyrtarisht, me dhjetëra të vdekur e të plagosur.
Tensionet në vend janë të paimagjinueshme, teksa qytetarët e Ukrainës kanë braktisur shtëpitë e tyre dhe po lënë vendin, për të shpëtuar gjallë nga kjo luftë. Vladimir Putin ka kërkuar që në këtë luftë të mos ndërhyjë askush, duke kërcënuar se do ta pësonte keq. Pamjet e trishta të luftës po bëjnë xhiron e rrjetit, teksa i prekur ka reaguar edhe publiku shqiptar.
Discussion about this post