Athinë: Në kërkim 64-vjeçari që dyshohet për tentativë sulmi ndaj 25-vjeçares me aftësi të kufizuara
Autoritetet kanë nisur një operacion kërkimi për gjetjen e 64-vjeçarit që dyshohet se tentoi të sulmonte seksualisht një 25-vjeçare me aftësi të kufizuara në zonën e Kypselit, në Athinë. Ai dyshohet se ka mbërritur në Shqipëri.
Nëna e vajzës, Katerina Beqari, deklaroi se kur u kthye në shtëpi e pa burrin mbi vajzën e saj/
Sipas përshkrimit të saj, ajo mori një tigan të madh dhe e goditi në kokë për ta larguar dhe për të mbrojtur të bijën.
Sipas pamjeve të kamerave të sigurisë të shtëpisë, 64-vjeçari shihet pak minuta para orës 10:00 të mëngjesit duke ecur drejt hyrjes së banesës, duke hapur derën me çelësa, duke hyrë brenda dhe duke e mbyllur pas vetes. Rreth pesë minuta më vonë, nëna hyn në shtëpi dhe përballet me skenën.
Stacioni televiziv MEGA publikoi pamje nga ngjarja, të cilat i cilësoi të rënda, por momenti i tentativës nuk u transmetua për arsye të kuptueshme. Në video shfaqet përplasja mes nënës dhe të dyshuarit, ku ai dyshohet se e goditi me shuplaka, shkelma dhe grushte, ndërsa ajo përpiqej ta ndalte me tigan. Më pas ai u largua nga banesa.
Në një intervistë për MEGA, nëna deklaroi se e pa burrin mbi vajzën e saj në shtrat, të zhveshur në pjesën intime. Ajo theksoi se sistemi i kamerave me zë brenda shtëpisë kishte regjistruar gjithçka. Sipas saj, ai u përpoq të vishej dhe të fshihej në banjë kur ajo hyri. Gjatë përplasjes, ajo rrëshqiti për shkak të një problemi në gju dhe në atë moment ai e goditi.
Vajza, e cila sipas nënës është me autizëm, u tremb nga skena dhe iu afrua nënës. Sipas dëshmisë, burri e goditi edhe vajzën në sy para se të largohej nga pallati, ndërsa fqinjët dëgjuan zhurmën.
Nëna njoftoi menjëherë policinë, dha dëshmi në komisariat dhe ka nisur procedurat ligjore me ndihmën e avokatit të saj, përfshirë masa ligjore mbrojtëse.
Sipas informacioneve, ekzaminimi mjeko-ligjor i 25-vjeçares ka përfunduar dhe rezulton se nuk ka pësuar abuzim seksual. Sipas nënës, bëhej fjalë për tentativë dhe ndërhyrja e saj e menjëhershme e pengoi përfundimin e aktit.
Autoritetet vijojnë hetimet për zbardhjen e plotë të ngjarjes dhe për lokalizimin e 64-vjeçarit.
gijotina.com/
Discussion about this post