Ilir Meta shprehet se për të nuk përbën asnjë shqetësim largimi deputetit të Shkodrës, Agron Çela te Edi Rama.
Në Çim Peka Live, Meta tha se largimi nuk ka qenë për çështje politike.
Opozita, tha Meta, nuk ka humbur asgjë nga largimi i Çelës, ndërsa solli në vëmendje largimet nga LSI të dy deputetëve të Fierit dhe në zgjedhjet e ardhshme kjo forcë politike mori dyfishin e votave në këtë qark.
“Unë nuk pengoj askënd që të ikë dhe t’i bashkohet Ramës. Nuk kam patur asnjë kontakt, asnjë takim, asnjë njoftim prej tij. Ndërkohë që 3-4 ditë para se të dilte ky lajm, kemi qenë në mbledhje Kryesie dhe dy javë më parë kemi qenë në Shkodër. Unë këtu nuk shoh asgjë politike. Në fund të fundit ka bërë një zgjedhje të tij dhe nuk përbën asnjë shqetësim për mua. Shpresoj të ketë qenë tërësisht i lirë dhe i pavarur në zgjedhjen që ka bërë. Në regjimin e Edi Ramës çdo gjë mund të ndodhë. Të iki unë te Rama? Kjo është e pamundur të ndodhë. Kush është shqetësimi? Pse iku nga opozita një deputet që kurrë nuk foli kundër qeverisë? Ka votuar ndonjëherë kundër qeverisë? Jo. S’kam asgjë për t’u shqetësuar. Dikur në LSI, iku një deputet i Fierit, iku edhe një tjetër. Thanë mbaroi LSI në Fier. LSI mori dyfishin e votave, dyfishin e mandateve. Unë shqetësohem kur ka diçka politike, ke një divergjencë politike me mua. Për arsye jo politike nuk jap dot shpjegime. Keni hallin e Shkodrës? Dera e shtëpisë time për të ka qenë e hapur edhe në orën 1 të natës për çdo hall e shqetësim. Telefoni im ka qenë gjithmonë i hapur për të. Tani ai ka ikur dhe unë e mësoj nga mediat. Ai është i lumtur, unë jam edhe më i lumtur se ai”, tha Meta.
Discussion about this post