Kryetari i PAA, Agron Duka, ka kërkuar që fermerëve t’u hiqet taksimi mbi vlerën e shtuar fermerëve në vend, duke depozituar një projektligj në Kuvend për ndryshimin e ligjit aktual.
Në relacionin që shoqëron ligjin thuhet se heqja e kësaj barre për fermerët do të garantojë një taksim më të drejtë për këtë kategori e cila ka shumë nevojë për mbështetje nga qeveria për të zhvilluar sektorin e bujqësisë në vend. Gjithashtu, Duka shprehet përmes këtij ligji se taksimi i drejtë dhe pa barra të tepërta do të rriste konkurrencën e ndershme në këtë sektor, pasi do të hiqet një detyrim arbitrar ndaj tyre.
“Në relacion shprehet se taksimi aktual për TVSH që paguajnë fermerët është një fasadë për përfitimet e qeverisë ndaj duhet të hiqet menjëherë. “Ky ndryshim ligjor ka si synim të heqë maskën e qeverisë me 6% dhe fondi shkojë për subvencione direkete për fermerët . Skema me 6% bie ndesh me nenin 3 të ligjit për TVSH”, thuhet në relacion.
Duka shprehet i bindur se këto ndryshime nuk sjellin shpenzime shtesë për buxhetin e shtetit, përkundrazi ndihmon edhe arkën edhe fermerët, prandaj kërkon të miratohet sa më shpjet të jetë e mundur.
Ndërkohë, në ditën e sotme edhe Lulzim Basha ka kërkuar disa ndryshime në ligjin për TVSH, ku propozoi uljen e TVSH për shportën ushqimore, reduktimin në 10 të TVSH për energjinë elektrike dhe heqjen e akcizës për gazin.
